बुटवल :- आसन्न प्रतिनिधि सभा निर्वाचनलाई लक्षित गर्दै नेपाली कांग्रेसका उम्मेदवारहरू घरदैलो अभियानमा सक्रिय भएका छन्। घरदैलोका क्रममा मतदाताले आफ्ना साना–साना समस्याहरू प्रत्यक्ष रूपमा उम्मेदवारसमक्ष राख्दै समाधानको प्रतिबद्धता मागेका छन्।
रुपन्देही क्षेत्र नम्बर २ बाट प्रतिनिधि सभा सदस्यका उम्मेदवार चुन्नप्रसाद शर्मा पौडेल तथा समानुपातिक उम्मेदवार रिता सेन ओली यतिबेला टोल–टोलमा पुगेर मतदातासँग भेटघाट गरिरहेका छन्।
अभियानको चौथो दिन बिहीबार सैनामैना नगरपालिका वडा नम्बर ४ र २ का विभिन्न टोलमा पुगेका उम्मेदवारसमक्ष स्थानीयले बाटोघाटो, बत्ती, सरसफाइ, रोजगारी सिर्जना र सुकुम्बासी समस्या समाधान जस्ता विषय उठाएका थिए।
घरदैलो अभियान पहिलो चरणमा मुर्गिया बजारबाट सुरु भई पुकारबाल्टी, अस्नैयाडाँडा, राधाकृष्ण टोल, प्रगति टोल, शान्तिटोल, सिसौडाँडा, रन्यौरा, झारबैरा हुँदै लुम्बिनी रोड र नापी क्षेत्रसम्म पुगेको थियो। वडा नम्बर २ अन्तर्गत झारबैरा, खकनपुर, कालिका टोल, सोरौली हुँदै रानीबगियासम्म पुग्दा मतदाताले शैक्षिक स्तर सुधार, सुकौली खोलाको तटबन्ध निर्माण, सडक पिच ढिलाइ र ढल निकास समस्या प्रमुख रूपमा उठाएका थिए।
स्थानीय बासिन्दाले नापी सम्पन्न भइसके पनि सुकुम्बासी समस्या समाधान नभएको, लालपुर्जा हातमा हुँदाहुँदै पनि जग्गासम्बन्धी झन्झट कायमै रहेको गुनासो सुनाए। यसअघि निर्वाचित सांसद तथा जनप्रतिनिधिले अपेक्षाअनुसार काम नगरेको उनीहरूको आरोप थियो।
घरदैलोका क्रममा उम्मेदवार पौडेलले आफू निर्वाचित भएपछि स्थानीयस्तरका यस्ता समस्यालाई प्राथमिकताका साथ समाधान गर्ने प्रतिबद्धता व्यक्त गरे। “स्थायित्व र विकास नेपाली कांग्रेस नेतृत्वमै सम्भव छ,” उनले भने, “प्रत्येक टोलका समस्या पहिचान गरी योजनाबद्ध ढंगले काम गर्नेछौं।”
पौडेलले पाँच वर्षभित्र नेपाललाई भ्रष्टाचारमुक्त बनाउने संकल्पसमेत जनतामाझ व्यक्त गर्दै त्यससम्बन्धी योजना पार्टीको घोषणापत्रमा समेटिएको बताए। सुकुम्बासी, सडक, शिक्षा र तटबन्ध निर्माणलाई प्राथमिकतामा राखिने उनको भनाइ थियो।
समानुपातिक उम्मेदवार ओलीले महिला, बालबालिका र सीमान्तकृत समुदायका मुद्दालाई संसदसम्म पुर्याउने प्रतिबद्धता जनाइन्। “शिक्षा, पूर्वाधार र सुकुम्बासी समस्यामा हामी गम्भीर छौं, जनताको साथमै रहेर काम गर्नेछौं,” उनले भनिन्।
यसअघि बुटवल उपमहानगरपालिका वडा नम्बर ७ र १ मा पनि घरदैलो कार्यक्रम गरिएको थियो। आगामी शुक्रबार तिलोत्तमा नगरपालिका वडा नम्बर ५ र ६ मा घरदैलो गरिने जानकारी रुपन्देही क्षेत्र नम्बर २ का निर्वाचन परिचालन मूल समितिका संयोजक तथा क्षेत्रीय सभापति प्रजापाल गिरिले दिएका छन्।घरदैलो कार्यक्रममा स्थानीय नेता–कार्यकर्ता तथा सर्वसाधारणको उल्लेख्य सहभागिता रहेको थियो।
