काठमाडौं, बुढानिलकण्ठ :-संस्कृति, परम्परा र समुदायबीचको एकतालाई सुदृढ बनाउने उद्देश्यका साथ बुढानिलकण्ठ नगरपालिका–३ चपलीमा यस वर्ष पनि ‘नेपाल सम्बत’ तथा नेवारी पर्व भव्यताका साथ सम्पन्न गरिएको छ।
नेवारी समुदायको ऐतिहासिक र सांस्कृतिक पहिचान झल्काउने यो पर्वले भाषा, कला, संस्कृति र सामाजिक एकतालाई बलियो बनाउने सन्देश दिएको छ।
कार्यक्रमको अध्यक्षता श्यामकाजी श्रेष्ठले गर्नुभयो भने, प्रमुख अतिथिका रूपमा नेपाल नेवा: दबु केन्द्रीय समितिका सदस्य नरेशकुमार ताम्राकार उपस्थित हुनुहुन्थ्यो।
त्यसैगरी, नगरप्रमुख मिठिराम मरासिनी, उप–प्रमुख अनिता लामा, र विभिन्न वडा अध्यक्षहरू अतिथिका रूपमा उपस्थित थिए।
कार्यक्रमको समन्वय र सञ्चालन संयोजक कृष्ण श्रेष्ठले गर्नुभएको थियो।
समारोहको सुरुवात परम्परागत नेवारी संगीत, ढोल–नगारा र ख्य: अनि पुखु: नाचबाट गरिएको थियो।
स्थानीय युवायुवतीहरूले परम्परागत पोशाकमा प्रस्तुत गरेका नाचगानहरूले कार्यक्रममा उत्सवको रौनक थपेका थिए।
अध्यक्ष श्यामकाजी श्रेष्ठले आफ्नो शुभकामना मन्तव्यमा भने —“हाम्रो संस्कृति हाम्रो पहिचान हो। नेपाल सम्बत जस्ता पर्वहरूले मौलिकता र एकताको सन्देश दिन्छन्। यसलाई जोगाउने जिम्मा हाम्रो पुस्ताले लिनुपर्छ।”
त्यसैगरी संयोजक कृष्ण श्रेष्ठले भने — “नेवारी समुदाय केवल एक जात होइन, यो नेपालको सांस्कृतिक सम्पदाको आधार हो। हामी सबैले भाषा, कला र परम्पराको संरक्षणमा जोड दिनुपर्छ।”
मुख्य अतिथि नरेशकुमार ताम्राकारले नेपाल नेवा: दबु केन्द्रीय समितिको तर्फबाट समुदायलाई निरन्तर सहयोग र मार्गदर्शन गर्ने प्रतिबद्धता जनाउँदै भने — “देशभर नेवारी संस्कृति फैलाउन र नयाँ पुस्तामा त्यसप्रति गर्वको भावना जागृत गर्न आवश्यक छ।”
कार्यक्रममा नगरप्रमुख मिठिराम मरासिनीले भने —“बुढानिलकण्ठ क्षेत्रको सांस्कृतिक विविधता र सह–अस्तित्वको प्रतीकका रूपमा नेपाल सम्बत उत्सवको महत्व अतुलनीय छ।”
पौदल र्याली बुढानिलकण्ठ नगर क्षेत्र हुँदै चपलीमा समापन गरिएको थियो।
कार्यक्रममा ज्येष्ठ नागरिक र सहयोगी व्यक्तिहरूलाई सम्मान गरिएको थियो।
