बुटवल :- चुनावी माहोल तातेका बेला नेपाली कांग्रेस रुपन्देही क्षेत्र नं. २ का उम्मेदवार चुन्नप्रसाद शर्मा पौडेलले तिलोत्तमा–६ स्थित मोक्षधाममा पूजाआजा तथा दर्शन गर्दै आफ्नो घरदैलो अभियान औपचारिक रूपमा सुरु गरेका छन्। धार्मिक आस्थासँगै जनसम्पर्कलाई जोड्दै सुरु गरिएको अभियानले स्थानीय राजनीतिक माहोललाई थप तातो बनाएको छ।
पश्चिम पौनीबाट सुरु भएको घरदैलो गोरकटवा, १२ नम्बर चोक हुँदै मणिग्रामसम्म पुगेको थियो। अभियानका क्रममा पौडेल प्रत्येक घरमा पुगेर कृषक, व्यवसायी, श्रमिक तथा सर्वसाधारणसँग प्रत्यक्ष संवादमा जुटे।
स्थानीयले कृषि उत्पादनको उचित बजार अभाव, व्यवसायिक चुनौती, युवाका लागि रोजगारी सिर्जना र पूर्वाधार विकासका विषयमा खुलस्त कुरा राखेका थिए।
उम्मेदवार पौडेलले जनताको गुनासो र सुझावलाई आफ्नो कार्ययोजनामा समेटेर कार्यान्वयन गर्ने प्रतिबद्धता जनाए। उनले विकासलाई कागजमा सीमित नराखी व्यवहारमा उतार्ने अठोट व्यक्त गरे।
घरदैलो कार्यक्रममा समानुपातिक उम्मेदवार रिता सेन ओली, क्षेत्रीय सभापति प्रजापाल गिरी, तिलोत्तमा–६ का सभापति युवराज भण्डारीलगायत कांग्रेसका नेता–कार्यकर्ता र स्थानीय बासिन्दाको उल्लेख्य सहभागिता रहेको थियो।
स्थानीयको उत्साहजनक उपस्थितिले रुपन्देही–२ मा कांग्रेसको चुनावी अभियान थप सक्रिय र सशक्त बन्दै गएको संकेत दिएको राजनीतिक वृत्तको भनाइ छ।
