बुटवल:- यही फागुन २१ गते हुने प्रतिनिधि सभा सदस्य निर्वाचनलाई लक्षित गर्दै नेपाली काँग्रेस ले भोलि बुटवलमा वृहत् चुनावी सभा आयोजना गर्ने भएको छ।
रुपन्देही केन्द्रित उक्त सभा बुटवलको देवीनगरस्थित लुम्बिनी वाणिज्य क्याम्पस बाहिरको खुला चौरमा बिहान १० बजेदेखि दिउँसो १ बजेसम्म सञ्चालन हुने कार्यक्रम तय गरिएको छ। सभालाई पार्टीका सभापति तथा भावी प्रधानमन्त्रीका उम्मेदवार गगनकुमार थापा ले विशेष सम्बोधन गर्ने कार्यक्रम रहेको छ।सभामा उनले वर्तमान राजनीतिक अवस्था, लोकतान्त्रिक सुदृढीकरण, सुशासन, रोजगारी सिर्जना, युवा सहभागिता तथा आर्थिक रूपान्तरणका विषयमा पार्टीको धारणा प्रस्तुत गर्ने जनाइएको छ।
नेपाली काँग्रेस रुपन्देही–२ का सभापति प्रजापाल गिरीका अनुसार रुपन्देहीमा काँग्रेसको पक्षमा जनलहर देखिएको छ। उनले भोलिको सभाले त्यसको स्पष्ट सन्देश दिने दाबी गरे। सभामा जिल्लाभरबाट नेता–कार्यकर्ता, शुभेच्छुक तथा मतदाताहरूको उल्लेख्य सहभागिता रहने अपेक्षा गरिएको छ।
काँग्रेसले लोकतन्त्रको रक्षा, विकास निर्माणमा तीव्रता, उद्योग–व्यवसाय प्रवर्द्धन, शिक्षा र स्वास्थ्य क्षेत्रमा सुधार तथा युवालाई स्वदेशमै अवसर सिर्जना गर्ने एजेन्डासहित चुनावी अभियान अघि बढाएको जनाएको छ। प्रधानमन्त्रीका उम्मेदवारसमेत रहेका पार्टी सभापतिसहित शीर्ष नेताहरूको उपस्थितिले स्थानीय उम्मेदवारहरूको जित सुनिश्चित गर्न थप ऊर्जा र उत्साह मिल्ने विश्वास लिइएको नेपाली काँग्रेस रुपन्देहीका सभापति रामकृष्ण खाण ले बताए।
रुपन्देहीका ५ निर्वाचन क्षेत्रमा नेपाली काँग्रेसबाट क्षेत्र नं. १ मा हिराबहादुर खत्री, २ मा चुन्नप्रसाद शर्मा पौडेल, ३ मा सुशील गुरुङ, ४ मा आसुतोष मिश्रा र ५ मा भरतकुमार शाह उम्मेदवार रहेका छन्।
