बुटवल :- लियो डिस्ट्रिक्ट काउन्सिल ३२५ पी नेपालले आफ्नो वार्षिक कार्यतालिकाअनुसार लियो युथ क्याम्प २०२५–२६ तथा दोस्रो काउन्सिल बैठकको पहिलो सत्र बुटवलबाट औपचारिक रूपमा सुरु गरेको छ।
काउन्सिलअन्तर्गत आबद्ध सम्पूर्ण लियो क्लब, पदाधिकारी तथा सदस्यहरूको सहभागितामा उक्त कार्यक्रम २०२६ जनवरी २३ र २४ गते पाल्पाको ऐतिहासिक तथा पर्यटकीय क्षेत्र जितगढी–रानीमहलमा सञ्चालन हुने काउन्सिलले जनाएको छ।
युवाहरूको नेतृत्व विकास, संगठनात्मक क्षमता अभिवृद्धि, आपसी समन्वय सुदृढीकरण तथा सेवामूलक भावनाको विकास गर्ने उद्देश्यले युथ क्याम्प आयोजना गरिएको लियो युथ क्याम्प डाइरेक्टर आत्मराम भण्डारी (गोकुलज्यू) ले जानकारी दिनुभयो।
यस क्याम्पले सहभागी लियो सदस्यहरूलाई सिकाइ, अनुभव आदान–प्रदान र नेटवर्क विस्तारको उत्कृष्ट अवसर प्रदान गर्ने विश्वास आयोजकले लिएको छ। ऐतिहासिक महत्व र प्राकृतिक सौन्दर्यले भरिपूर्ण रानीमहल क्षेत्रमा आयोजना हुने भएकाले कार्यक्रम थप प्रभावकारी, प्रेरणादायी र स्मरणीय हुने अपेक्षा गरिएको छ।
कार्यक्रमको होस्ट क्लब लियो क्लब अफ बुटवल गोल्डेन जुब्ली रहेको छ। दर्तासम्बन्धी विस्तृत जानकारी, भुक्तानी प्रक्रिया तथा क्यूआर कोड कार्यक्रमको आधिकारिक पोस्टरमार्फत उपलब्ध गराइएको काउन्सिलले जनाएको छ।
लियो डिस्ट्रिक्ट काउन्सिल ३२५ पी नेपालले यस कार्यक्रममार्फत लियो क्लबहरूबीचको सहकार्य थप मजबुत बनाउँदै क्लबहरूलाई अझ सशक्त, अनुशासित र प्रभावकारी बनाउने लक्ष्य लिएको जनाएको छ। काउन्सिलले सबै लियो क्लबहरूलाई अधिकतम सहभागिता जनाई कार्यक्रम सफल बनाउन आह्वानसमेत गरेको छ।
यसै क्रममा आयोजित कार्यक्रममा बुटवल उपमहानगरपालिकाका प्रमुख खेलराज पाण्डे प्रमुख अतिथिका रूपमा सहभागी रहनुभएको थियो। कार्यक्रममा लायन्स डिस्ट्रिक्ट ३२५ पी नेपालका आईपीपी लायन पुरुषोत्तम भक्त प्रधानाङ्ग, लियो डिस्ट्रिक्ट ३२५ पी नेपालका चेयरपर्सन लायन अरुण पन्थी, लियो जिल्ला परिषद् ३२५ पी नेपालका अध्यक्ष लियो लायन श्रीधर बस्याल, फर्स्ट लेडी ईशा अर्याल , उपाध्यक्ष लियो लायन सुस्मा बस्याल, मेम्बरशिप चेयरपर्सन लियो लायन हिमाल खनाल, लियो क्लब अफ बुटवल सेन्ट्रलका सचिव तथा देउराली दर्शन मिडियाका सञ्चालक सुदीप ज्ञवाली लगायतको उल्लेखनीय सहभागिता रहेको थियो।
प्रमुख अतिथि पाण्डेले लियो युथ क्याम्पले युवामाझ छुट्टै पहिचान बनाउन सफल भएको उल्लेख गर्दै, जितगढी किल्लाबाट रानीमहल तथा जितगढीबाट लुम्बिनीसम्म साइकलिङ कार्यक्रम सञ्चालन गर्न सकिए युवाहरू पर्यटन प्रवर्द्धनमा मुख्य भूमिकामा देखिने धारणा व्यक्त गर्नुभयो।कार्यक्रमको सञ्चालन लियो लायन श्रीधर कुँवरले गर्नुभएको थियो।
