बुटवल:- शिवनगर सामुदायिक वन उपभोक्ता समूहको ३०औँ वार्षिक साधारण सभा बुटवल उपमहानगरपालिकाका प्रमुख खेलराज पाण्डेको प्रमुख आतिथ्यतामा सम्पन्न भएको छ।
साधारण सभालाई सम्बोधन गर्दै नगर प्रमुख पाण्डेले शिवनगर सामुदायिक वनलाई धार्मिक तथा पर्यटकीय वनका रूपमा विकास गर्न आवश्यक रहेको बताउनुभयो। उहाँले भन्नुभयो,
“यस क्षेत्रमा रहेको गौशालाको दीगो व्यवस्थापनका लागि वनलाई धार्मिक तथा पर्यटकीय गन्तव्यका रूपमा विस्तार गर्नुपर्छ। नगरपालिकाले वन संरक्षण र विकासका लागि आवश्यक जुनसुकै सहयोग गर्न तयार छ।”
साथै, उहाँले शिवनगर क्षेत्रमा देखिएको खानेपानी समस्याको समाधान छिट्टै गरिने प्रतिबद्धता समेत व्यक्त गर्नुभयो।
कार्यक्रममा नेकपा एमालेका नेता तथा पूर्व नगर प्रमुख शिवप्रसाद सुवेदीले वनको संरक्षण र व्यवस्थापनमा सबै पक्ष सक्रिय हुनुपर्नेमा जोड दिनुभयो। उहाँले भन्नुभयो,“विगतमा सरकारी नीतिका कारण समस्यामा परेको वन क्षेत्र सामुदायिक वनमा आएपछि अब यसको संरक्षण गर्ने जिम्मेवारी प्रत्येक नागरिकको हो।”
उद्घाटन सत्रमा सञ्चालक समितिका अध्यक्ष मनोज गौचनले गत एक वर्षमा सञ्चालक समितिले गरेका गतिविधि, वन संरक्षण कार्यक्रम, विकास परियोजना तथा आगामी वर्षका योजनाहरू समेटिएको वार्षिक प्रतिवेदन प्रस्तुत गर्नुभयो। उहाँले वन संरक्षण, वातावरणीय सन्तुलन, पर्यटन विकास र समुदायको सक्रिय सहभागिताको महत्व औँल्याउनुभयो।
साधारण सभामा विभिन्न राजनीतिक दलका नेता, जनप्रतिनिधि तथा टोल विकास संस्थाका प्रतिनिधिहरूले शुभकामना मन्तव्य व्यक्त गरेका थिए। शुभकामना व्यक्त गर्ने प्रमुख व्यक्तिहरूमा एमाले बुटवल नगर अध्यक्ष शोभाखर पोखरेल, नेपाली कांग्रेस नगर उपसभापति ज्योति भण्डारी, नेपाली कम्युनिस्ट पार्टी नगर संयोजक महेन्द्र भुसाल लगायत रहनुभएको थियो।
कार्यक्रमको सञ्चालन सचिव श्यामकुमारी आचार्यले गर्नुभएको थियो भने सह–सचिव शिवबहादुर अधिकारीले स्वागत मन्तव्य व्यक्त गर्नुभएको थियो। त्यसैगरी कोषाध्यक्ष रविन केसीले समूहको आर्थिक प्रतिवेदन प्रस्तुत गर्नुभएको थियो।
हाल शिवनगर सामुदायिक वनमा करिब चार हजार उपभोक्ताहरू आवद्ध रहेका छन्। साधारण सभाको बन्द सत्रमा अध्यक्ष, कोषाध्यक्ष तथा लेखा समितिद्वारा प्रस्तुत प्रतिवेदनहरू सर्वसम्मत रूपमा अनुमोदन गरिएको थियो। साथै साधारण सभाले आगामी वर्ष वन संरक्षण, पर्यटकीय पूर्वाधार विकास, गौशाला व्यवस्थापन तथा समुदाय केन्द्रित कार्यक्रमहरूलाई प्राथमिकताका साथ अघि बढाउने निर्णय गरेको छ।
