बुटवल :- भेनेजुएलामाथि अमेरिकी साम्राज्यवादी हस्तक्षेप र दबाबको विरोधमा बुटवलको पुष्पलाल पार्कमा विरोध कार्यक्रम सम्पन्न भएको छ। विभिन्न वामपन्थी तथा प्रगतिशील राजनीतिक दल तथा संगठनहरूको संयुक्त आयोजनामा सम्पन्न उक्त कार्यक्रममा भेनेजुएलाको सार्वभौमिकता, स्वतन्त्रता र स्वाधीनतामाथि भइरहेको हस्तक्षेप तत्काल बन्द गर्न माग गरिएको छ।
विरोध कार्यक्रममा सहभागीहरूले ‘भेनेजुएलाको सार्वभौम सत्तामाथिको आक्रमण बन्द गर’, ‘भेनेजुएलाबाट अमेरिकी सेना फिर्ता गर’ तथा ‘भेनेजुएलाका राष्ट्रपति निकोलस मादुरोलाई अविलम्ब रिहा गर’ जस्ता नारा लेखिएका प्लेकार्ड र ब्यानर प्रदर्शन गरेका थिए।
ब्यानरहरूमा भेनेजुएलामाथि भइरहेको अमेरिकी साम्राज्यवादी सैन्य तथा राजनीतिक हस्तक्षेपको कडा विरोध जनाइएको थियो।
विरोध सभालाई सम्बोधन गर्दै वक्ताहरूले शक्तिशाली राष्ट्रहरूले कमजोर र स्वतन्त्र मुलुकहरूमाथि आर्थिक नाकाबन्दी, राजनीतिक हस्तक्षेप र सैन्य दबाब सिर्जना गर्नु अन्तर्राष्ट्रिय कानुन तथा मानव अधिकारको ठाडो उल्लङ्घन भएको बताए।
उनीहरूले भेनेजुएलाका जनताले आफ्नो भविष्य आफैं निर्धारण गर्ने अधिकार रहेको उल्लेख गर्दै कुनै पनि प्रकारको बाह्य हस्तक्षेप अस्वीकार्य भएको धारणा व्यक्त गरे।
एक वक्ताले “अमेरिकी साम्राज्यवादले विश्वका विभिन्न मुलुकहरूमा अशान्ति फैलाउँदै आएको छ, भेनेजुएला पनि त्यसैको सिकार बनेको छ,” भन्दै अन्यायविरुद्ध जहाँबाट सम्भव हुन्छ त्यहींबाट आवाज उठाउनु आवश्यक रहेको बताए। अर्का वक्ताले विश्वका प्रगतिशील शक्ति र जनसमुदाय एकजुट भएर साम्राज्यवादी हस्तक्षेपविरुद्ध संघर्ष गर्नुपर्ने आवश्यकता औँल्याए।
चिसो मौसमका बाबजुद उल्लेख्य संख्यामा सर्वसाधारण, राजनीतिक कार्यकर्ता तथा समर्थकहरूको सहभागितामा विरोध कार्यक्रम शान्तिपूर्ण रूपमा सम्पन्न भएको थियो। आयोजकका अनुसार अन्तर्राष्ट्रिय ऐक्यबद्धता प्रकट गर्न यस्ता कार्यक्रमहरू आगामी दिनमा पनि निरन्तर आयोजना गरिनेछ।
कार्यक्रम क्रान्तिकारी कम्युनिष्ट पार्टी नेपाल, नेपाल कम्युनिष्ट पार्टी (माओवादी केन्द्र) समर्थित समूह, नेपाल कम्युनिष्ट पार्टी (मसाल) तथा राष्ट्रिय जनमोर्चा सम्बद्ध संगठनहरूको सहभागितामा आयोजना गरिएको हो। आयोजकहरूले विश्वभर शान्ति, स्वतन्त्रता र राष्ट्रिय सार्वभौमिकताको पक्षमा उभिन सबैलाई आह्वानसमेत गरेका छन्।
