माघ :- २०४४ सालमा बुटवल झरेर व्यवसाय सुरु गरेका व्यवसायी चुन्नप्रसाद पौडेलले यस क्षेत्रमै व्यवसायिक पहिचान बनाउँदै पछि उद्योग क्षेत्रमा समेत लगानी गरी वरिष्ठ उद्योगीको पहिचान बनाएका छन्।आसन्न प्रतिनिधि सभा निर्वाचनमा नेपाली काँग्रेसबाट रुपन्देही क्षेत्र नं. २ का उम्मेद्वार बनेका समाजसेवी पौडेलको पक्षमा जनसमर्थन बढ्दै गएको छ।
मंगलबार बुटवलमा आयोजित किराना व्यवसायीहरूसँगको अन्तरक्रिया कार्यक्रममा व्यवसायीहरूले उम्मेद्वार पौडेललाई हेर्दा आफ्नै वर्गको प्रतिनिधि भएको अनुभूति हुने बताउँदै पूर्ण साथ र सहयोग रहने प्रतिबद्धता जनाएका छन्।उनीहरूले यस निर्वाचनमा पार्टीभन्दा पनि व्यवसायीको प्रतिनिधित्व गर्ने उम्मेद्वारलाई जिताउने प्रतिबद्धता व्यक्त गरे।
खुद्रा किराना व्यवसायी संघका अध्यक्ष गोपालकुमार प्रधानको अध्यक्षतामा सम्पन्न कार्यक्रममा संघका सल्लाहकार कृष्णप्रसाद पाण्डे, महासचिव यमलाल बेलवासे लगायत व्यवसायीहरूले पौडेलको जीतले व्यवसायीको पहिचान स्थापित हुने र समस्याको समाधान सहज हुने विश्वास व्यक्त गरे।
कार्यक्रममा बोल्दै उम्मेद्वार चुन्नप्रसाद पौडेलले आफू खुद्रा किराना व्यवसायबाटै उद्योगी बनेको उल्लेख गर्दै व्यवसायीका समस्या नजिकबाट बुझेको बताए।
उनले व्यवसायीका समस्या समाधानका लागि आवश्यक नीतिगत सुधार व्यवसायीहरूसँगै बसेर तयार गर्ने प्रतिबद्धता व्यक्त गरे।त्यस अवसरमा नेपाली काँग्रेस रुपन्देही क्षेत्र नं. २ का सभापति तथा निर्वाचन परिचालन मूल समितिका संयोजक प्रजापाल गिरीले पौडेल उद्योगी–व्यवसायीका अभिभावक भएको उल्लेख गर्दै उनको जीतले क्षेत्रको औद्योगिक तथा व्यवसायिक विकासमा ठूलो योगदान पुग्ने विश्वास व्यक्त गरे।उनले देशको विकास र समृद्धिका लागि रुख चिन्हमा मतदान गरी पौडेललाई विजयी गराउन आग्रह गरे।
विभिन्न राजनीतिक दल परित्याग गरी बुटवलका विभिन्न वडाबाट २४ जना युवा नेपाली काँग्रेसमा प्रवेश गरेका छन्।मुलुकको विकासका लागि स्थिर र प्रतिबद्ध पार्टी नेपाली काँग्रेस मात्रै रहेको निष्कर्षसहित, माओवादी द्वन्द्वकालमा भूमिगत जीवन बिताएकाहरू समेत काँग्रेसमा प्रवेश गरेका हुन्।देशप्रतिको निष्ठा र विकासप्रतिको समर्पण काँग्रेसमा मात्रै देखेर पार्टी प्रवेश गरेको उनीहरूको भनाइ छ।
उनीहरूलाई रुपन्देही क्षेत्र नं. २ का प्रतिनिधि सभा सदस्य उम्मेद्वार चुन्नप्रसाद पौडेल, क्षेत्रीय सभापति प्रजापाल गिरीलगायत काँग्रेस नेताहरूले मंगलबार बुटवल उपमहानगरपालिका वडा नं. ८ मा आयोजित कार्यक्रममा पार्टीमा स्वागत गरेका थिए।यसैबीच, मंगलबार नै तिलोत्तमा नगरपालिका वडा नं. २ मा नेपाली काँग्रेसको प्रचार–प्रसार सम्पर्क कार्यालय उद्घाटन गरिएको छ।
