विराटनगर :- सुनसरी जिल्लामा सशस्त्र प्रहरी बल (एपीएफ) ले चलाएको गोली लागेर एक जनाको मृत्यु भएको छ। तस्करी नियन्त्रणका लागि खटिएको एपीएफ टोलीले चलाएको गोली लागेर कोशी गाउँपालिका–१ का ४५ वर्षीय विजय साह को ज्यान गएको हो।
घटना बुधबार राति करिब १:१० बजे कोशी गाउँपालिका–१ स्थित पुरी टोल मा भएको जिल्ला प्रहरी कार्यालय सुनसरीका प्रवक्ता चन्द्रबहादुर खड्का ले जानकारी दिए। उनका अनुसार मृतक साह सोही वडाका स्थायी बासिन्दा हुन्।
प्रहरीका अनुसार साहले आफ्नै सिटी सफारीमा ८–१० बोरा चिनी लोड गरी भारतबाट नेपालतर्फ ल्याइरहेका थिए। सवारी साधन रोक्ने क्रममा मालसामान ओसारपसारको विषयलाई लिएर प्रहरी र साहबीच केही समय विवाद भएको र त्यसै क्रममा गोली प्रहार भएको बताइएको छ।
घटनापछि आक्रोशित स्थानीयले शव उठाउन नदिई प्रदर्शन गरिरहेका छन्। स्थानीयवासीले लेनदेनसम्बन्धी विवादका कारण गोली हानिएको दाबी गर्दै निष्पक्ष छानबिनको माग गरेका छन्।
सशस्त्र प्रहरी बल कोशी प्रदेशका प्रमुख डीआईजी कुमार न्यौपाने ले भने तस्करको समूहसँग दोहोरो गोली हानाहान भएको दाबी गरेका छन्।
उनले भने, “चोरीको सामान रहेको सवारी रोक्न खोज्दा प्रहरीमाथि गोली प्रहार भयो। त्यसपछि एपीएफले जवाफी फायरिङ गरेको हो।”
हाल घटनास्थलमा प्रहरी परिचालित रहेको र कानुनी प्रक्रिया पूरा गर्दै मुचुल्का उठाउने काम भइरहेको जनाइएको छ। घटनाबारे थप अनुसन्धान भइरहेको प्रहरीले जनाएको छ।
