गुल्मी:- आसन्न प्रतिनिधिसभा निर्वाचनमा नेपाली कांग्रेसबाट गुल्मी जिल्ला निर्वाचन क्षेत्र नं. १ का लागि महासमिति सदस्य ई. अमृत ज्ञवालीले उम्मेदवारी आकांक्षा सार्वजनिक गरेका छन्।
पार्टीका अग्रज नेताहरूको सम्मान गर्दै ज्ञवालीले आफू पनि प्रतिनिधिसभा निर्वाचनमा उम्मेदवार बन्न इच्छुक रहेको स्पष्ट पारेका हुन्। उनले गुल्मी जिल्लाको कुल जनसंख्या करिब २ लाख ४७ हजार रहेको र निर्वाचन क्षेत्र नं. १ मा करिब १ लाख २० हजार जनसंख्या बसोबास गर्दै आएको उल्लेख गरे। साथै, उक्त क्षेत्रको जनसंख्या वृद्धिदर ऋणात्मक रहेको जानकारीसमेत गराए।
भू–बनोट, सामाजिक, आर्थिक, जातीय तथा सांस्कृतिक विविधता यस क्षेत्रको प्रमुख विशेषता भएको उल्लेख गर्दै ज्ञवालीले सडक, पुल, खानेपानी, सिँचाइ र विद्युतजस्ता पूर्वाधार विस्तार भए पनि ती आयोजनाको वास्तविक उपलब्धि, गुणस्तर र प्रभावकारिताबारे गम्भीर समीक्षा आवश्यक रहेको बताए।
उनले योजनाबिनाको बजेट वितरणलाई विकास मान्न नसकिने धारणा राख्दै २०६२/६३ पछि भएका विकास लगानीहरूको वस्तुगत मूल्यांकन हुनुपर्ने आवश्यकता औँल्याए। विकासलाई केवल भौतिक पूर्वाधारमा सीमित नगरी सुरक्षा, निर्भयता, न्याय, पारदर्शिता, सुशासन, शिक्षा र स्वास्थ्य सेवामा नागरिकको पहुँचका आधारमा पनि मूल्यांकन गर्नुपर्ने उनको भनाइ छ।
ज्ञवालीले आधुनिक प्रविधिको प्रयोग, ग्रामीण–शहरी सम्बन्ध सुदृढीकरण, स्रोत–साधनको सही परिचालन र सेवाको न्यायपूर्ण वितरणलाई प्राथमिकतामा राखिने बताए। साथै उद्यमशीलता प्रवर्द्धन, उत्पादन वृद्धि, मानव संसाधन विकास, पर्यटन, धार्मिक तथा सांस्कृतिक सम्पर्क विस्तार, जलस्रोत, वनसम्पदा र निर्यातमुखी कृषि विकासलाई प्रमुख एजेन्डा बनाइने उल्लेख गरे।
लोकतान्त्रिक प्रणालीको सुदृढता, संसदीय व्यवस्था, नीतिगत नेतृत्व र कानुन निर्माण तथा स्थानीय आवश्यकताबीच समन्वय गर्दै काम गरिने प्रतिबद्धता जनाउँदै उनले अभियानलाई प्रभावकारी बनाउन नागरिकहरूबाट सुझाव, सल्लाह र विश्वसनीय सूचनाको अपेक्षा गरिएको जानकारी दिए।
