रुकुम पूर्वमा मोटरसाइकल दुर्घटना, १ जनाको मृत्यु र २ घाइते

रुकुम पूर्व:- रुकुम पूर्व जिल्ला सदरमुकाम रुकुमकोटमा आज अपराह्न भएको मोटरसाइकल दुर्घटनामा एक जनाको मृत्यु भएको छ भने दुई जना घाइते भएका छन्।

मध्यपहाडी लोकमार्गअन्तर्गत कमलदहबाट कैँचीमोडतर्फ जाँदै गरेको भे८प ६७९७ नम्बरको मोटरसाइकल दुर्घटना भएको थियो। घटनास्थलमा चालक समिर गिरी (१९, आठबिसकोट नगरपालिका–११, ढुकसेनी, रुकुम पश्चिम) को मृत्यु भएको जिल्ला प्रहरी कार्यालय रुकुम पूर्वले जनाएको छ।

दुर्घटनामा घाइते भएका सुरेश गिरी (१८) र अनिता डाँगी (१०, त्रिवेणी गाउँपालिका–७, रुकुम पश्चिम) लाई उपचारका लागि जिल्ला अस्पताल रुकुमकोट लगिएको छ। चिकित्सकले मृतक गिरीलाई घटनास्थलमै मृत घोषणा गरेका थिए।

प्रहरीले दुर्घटनाको कारण अनुसन्धान भइरहेको र घाइतेहरूको उपचार भइरहेको जानकारी दिएको छ।