बुटवल :-लुम्बिनी प्रादेशिक अस्पताल बुटवलले पहिलो पटक न्यूरो इन्टरभेन्सन सुविधा सञ्चालनमा ल्याएको छ। यससँगै ब्रेन स्ट्रोक, ट्यूमर र स्नायू रोगहरूको उपचार र निदानमा सहजता आउने अपेक्षा गरिएको छ।
न्यूरो इन्टरभेन्सन प्रविधि मस्तिष्क, मेरुदण्ड तथा तिनसँग सम्बन्धित रक्तनलीका समस्याको औषधि र सर्जरीबीचको आधुनिक उपचार पद्धति हो।
अस्पतालका न्यूरो सर्जन डा. राजिव भण्डारीको नेतृत्वमा शनिबार दुई बिरामीको एन्युरिज्म उपचार सफलतापूर्वक सम्पन्न भएको छ। उनले यो सफलताले उपचार सेवामा नयाँ उत्साह थपेको बताए।
उनीसँगै उपचारमा सहभागी डा. करुणा ताम्राकार, डा. स्मृति आचार्य, डा. सन्तोष भट्टराई र डा. मनिष पराजुलीलाई धन्यवाद ज्ञापन गरिएको छ। साथै नर्स, क्याथ ल्याब, आइसियू, एनेस्थेसिया टिम र अस्पताल प्रशासनको समेत महत्वपूर्ण योगदान रहेको बताइएको छ।
डा. भण्डारीका अनुसार यो प्रविधिबाट रगतको नलीमार्फत रोगग्रस्त भागसम्म पुगेर समस्या समाधान गरिन्छ।
यो प्रविधि विशेष गरी —
मस्तिष्कको रक्तनली फुट्ने वा अवरुद्ध हुने,
स्ट्रोक,
क्यारोटिड आर्टरी ब्लकेज,
इंट्राक्रानियल हेमोरेज,
रगत आपूर्तिबाट निर्भर ट्यूमर —
जस्ता रोगहरूमा प्रयोग गरिन्छ।
उपचारका क्रममा धातुको सानो तार राख्ने, धमनी खुलाउने, स्ट्रोकमा जमेको रगत निकाल्ने तथा असामान्य रक्तनली बन्द गर्ने कार्य गरिन्छ।
यो प्रविधि कम जोखिमपूर्ण, छिटो निको हुने र संक्रमणको सम्भावना न्यून हुने भएकाले बिरामीका लागि प्रभावकारी मानिन्छ।
अस्पतालका मेडिकल सुपेरिन्टेन्डेन्ट डा. इन्द्र ढकालले भने,“विशिष्ट सेवा विस्तारका क्रममा निरन्तर प्राप्त सफलताले अस्पताल परिवार र सेवाग्राही दुवैलाई उत्साहित बनाएको छ।”
उनका अनुसार अस्पतालले नयाँ प्रविधि र दक्ष जनशक्ति परिचालन गर्दै सेवा विस्तारलाई निरन्तरता दिने योजना अघि बढाएको छ।
