बुटवल :- एनसेलको गम्भीर लापरवाहीका कारण बुटवल ११ का युवा समुद्र श्रेष्ठ ठूलाे साइबर ठगीको सिकार बनेका छन्। असम्बन्धित व्यक्तिलाई ई–सिम उपलब्ध गराएपछि स्क्यामरले श्रेष्ठका विभिन्न बैंक खाताबाट ५ लाख ७१ हजार रुपैयाँ चोरी गरेका हुन्।
घटना बाहिरिएपछि आक्रोशित पीडित तथा स्थानीय युवाहरूले बुटवलस्थित एनसेल सेन्टरमा तालाबन्दी गर्दै तत्काल कारबाहीको माग गरेका छन्।
श्रेष्ठका अनुसार ‘जीवन पौडेल’ नाम बताउने व्यक्तिले विदेश जाने प्रक्रिया भन्दै पासपोर्ट, नागरिकता लगायतका कागजात मागे। झण्डै १५ दिन निरन्तर कुराकानी र विश्वास जगाइएपछि उनले कागजात पठाए। यही कागजात दुरुपयोग गर्दै स्क्यामरले श्रेष्ठ प्रयोग गर्दै आएको एनसेल नम्बरबाट ई–सिम निकाल्न सफल भएको स्थानीयको आरोप छ।
श्रेष्ठ भन्छन् :-“शुक्रबार साँझ अचानक मेरो फिजिकल सिम बन्द भयो। एनसेल गएर बुझ्दा मेरो नम्बरबाट ई–सिम नै निस्किएछ। त्यसपछि मात्र बैंक खाताका रकम गायब भएको थाहा पाएँ।”
स्थानीय युवाहरूले एनसेलका वितरण प्रतिनिधि मनिष क्षेत्रीको मिलेमतो नभइकन ई–सिम जारी हुन नसक्ने भन्दै कठोर कारबाही माग गरेका छन्। प्रमाणबिना कसैको ई–सिम जारी गर्नु प्रतिनिधिको प्रत्यक्ष लापरवाही भएको उनीहरूको तर्क छ।
यस विषयमा एनसेल बुटवल क्षेत्रीय कार्यालयका बिजनेस हेड विनय डंगोलले घटनाबारे आफूहरूसँग आधिकारिक जानकारी नभएको भन्दै जवाफ दिन नमिल्ने प्रतिक्रिया दिए।
“यो विषय केन्द्रीय कार्यालयको अधिकारक्षेत्रमा पर्छ। त्यहाँबाट जानकारी आएपछि मात्र बोल्न सक्छौँ,” उनले भने।
उता, ईलाका प्रहरी कार्यालय बुटवलका डीएसपी इन्द्रबहादुर रानाले सोमबार उजुरी दर्ता भएको र साइबर ठगीसम्बन्धी अनुसन्धान सुरु गरिएको जानकारी दिए।
