बुटवल:- एक समय धुलो, हिलो र अव्यवस्थाको पर्याय बनेको बुटवल–मैनाबगर अटोभिलेज अहिले क्रमशः व्यवस्थित बन्दै गएको छ। पक्की सडक र ढल व्यवस्थापनपछि क्षेत्रको स्वरूप फेरिँदै जाँदा व्यवसायीमा पनि आशा पलाएको छ। यही सन्दर्भमा बुटवल उपमहानगरपालिकाका प्रमुख खेलराज पाण्डेयले मैनाबगर अटोभिलेजलाई थप व्यवस्थित र व्यवसायमैत्री बनाउने स्पष्ट प्रतिबद्धता व्यक्त गर्नुभएको छ।
बुटवल अटो इन्जिनियरिङ एशोसिएसन रुपन्देही–लुम्बिनीको ३०औँ साधारणसभामा बोल्दै मेयर पाण्डेयले बुटवलभित्र सञ्चालित कुनै पनि व्यवसाय विस्थापित हुन नदिने अडान दोहोर्याउनुभयो। पोखरामा अटो व्यवसायी विस्थापित हुन लागेको खबरले आफूलाई दुःखी बनाएको बताउँदै उहाँले व्यवसाय जन्माउन धेरै वर्ष लाग्ने भएकाले समाधानको बाटो विस्थापन होइन, वैकल्पिक व्यवस्थापन हुनुपर्नेमा जोड दिनुभयो।
कार्यक्रममा व्यवसायीहरूले मैनाबगर अटोभिलेजको दीर्घकालीन विकासका विषयमा आफ्ना अपेक्षा राखे। संस्थाका अध्यक्ष प्रेम गौचनले अटोभिलेजको दायरा विस्तार गर्दै सेटेलाइट अटोभिलेज निर्माणको अवधारणा अघि सार्नुभयो। साथै, चोरी तथा अवैध गतिविधि नियन्त्रणमा प्रभावकारी कदम चाल्नुपर्ने आवश्यकता औँल्याउनुभयो।
नेपाल अटोमेकानिक्स व्यवसायी महासंघका केन्द्रीय अध्यक्ष गोपाल भट्टराईले देशभर अटोभिलेज निर्माणका लागि महासंघ सक्रिय भएर लाग्ने प्रतिबद्धता जनाउनुभयो। गण्डकी प्रदेशबाट सहभागी विष्णु अधिकारीले मेकानिक्स व्यवसायप्रति राज्यको बुझाइ क्रमशः सकारात्मक बन्दै गएको अनुभव सुनाउनुभयो।
साधारणसभामा बोल्ने अधिकांश वक्ताले प्रविधिको विकाससँगै सीप अभिवृद्धि अपरिहार्य भएको धारणा राखे। बुटवल उद्योग वाणिज्य संघका वरिष्ठ उपाध्यक्ष टकप्रसाद गैरेले व्यवसायको मर्यादा कायम राख्दै नयाँ प्रविधि आत्मसात् गर्नुपर्ने बताए भने चेम्बर अफ कमर्शका अध्यक्ष टंकप्रसाद पोख्रेलले युवापुस्तालाई सीपमुखी बनाउनुपर्नेमा जोड दिए।
कार्यक्रममा संघका अध्यक्ष प्रेम गौचन, महासचिव पुनित पोख्रेल र कोषाध्यक्ष नमराज सुवेदीले प्रस्तुत गरेका वार्षिक तथा आर्थिक प्रतिवेदन सर्वसम्मतले पारित गरियो। साथै, दीर्घ योगदान पु¥याएका जेष्ठ सदस्यदेखि महिला व्यवसायीसम्मलाई सम्मान गरिँदा सभामा उत्साह थपिएको थियो।
धुलो र हिलोबाट सुरु भएको मैनाबगर अटोभिलेजको यात्रा अब पूर्वाधार, नीति र सहकार्यको बलमा नयाँ चरणतर्फ अघि बढ्दैछ। व्यवसायी र स्थानीय सरकारबीचको सहकार्य निरन्तर रहन सके, मैनाबगर नमुना अटोभिलेजका रूपमा स्थापित हुने अपेक्षा गरिएको छ।
