बुटवल, रूपन्देही : – लियो क्लब अफ बुटवल गोल्डेन जुब्लिले बुटवल–१३, बेलबास बदेलपोखरास्थित जितेश्वरी माध्यमिक विद्यालयमा खानेपानी धारा निर्माण गरी हस्तान्तरण गरेको छ। करिब ५०० भन्दा बढी विद्यार्थी अध्ययन गर्ने यो विद्यालयमा वर्षौंदेखि सुरक्षित पिउने पानीको अभाव रहेकाले क्लबले सामाजिक उत्तरदायित्वअन्तर्गत धारा निर्माण गरेको हो।
क्लबका संस्थापक अध्यक्ष भेषराज पोख्रेलको परिकल्पनामा, उनका दिवंगत पिता नुमराज पोख्रेलको स्मृतिमा यस धारा निर्माण परियोजना अघि बढाइएको हो। “विद्यार्थीको स्वास्थ्य र सहज शिक्षण वातावरणलाई लक्षित गर्दै पिउने पानीको सुविधालाई प्राथमिकता दिएका हौँ,” धारा निर्माण समितिका संयोजक गोकुल भण्डारीले जानकारी दिए।
१८ देखि ३० वर्ष उमेर समूहका युवाहरूको नेतृत्वमा सञ्चालित लियो क्लब अफ बुटवल गोल्डेन जुब्लिले सामाजिक रूपान्तरणमा अग्रसर हुँदै फजुल खर्च कटौतीबाट संकलित रकम तथा सदस्यहरूको स्वैच्छिक सहयोगमा योजना सम्पन्न गरेको क्लबका अध्यक्ष लियो अशोक श्रेष्ठले बताए।
धारा निर्माण समितिमा उपाध्यक्ष लक्ष्मण खनाल र सदस्य बिशाल खनालले सक्रिय भूमिका निर्वाह गरेका थिए। परियोजना निर्माणका लागि अहिलेसम्म करिब १ लाख रुपैयाँ खर्च भइसकेको र सम्पूर्ण काम सम्पन्न हुन डेढ लाख रुपैयाँसम्म लाग्ने अनुमान रहेको क्लबका कोषाध्यक्ष मनोज पाण्डेले बताए।
शैक्षिक संस्थामा आधारभूत सुविधा अभाव भइरहँदा युवाहरू स्वयं अघि आएर सार्थक काम गरेको यो पहल विद्यालय समुदायले सराहना गरेको छ।
