बुढानिलकण्ठ :- महिलामाथि हुने हिंसा तथा सामाजिक विभेदका घटनालाई रोक्न र महिला–मैत्री वातावरण निर्माण गर्न बुढानिलकण्ठ नगरपालिका–३ ले सकारात्मक पहलहरू अघि बढाएको छ। महिला वडा सदस्य बालमाया श्रेष्ठको सक्रिय नेतृत्वमा वडामा महिला सुरक्षा, कानुनी परामर्श र मनोपरामर्श सेवाहरू क्रमशः सहज हुँदै गएका छन्।
श्रेष्ठका अनुसार पछिल्ला महिनाहरूमा समुदाय–स्तरमा अन्तरक्रिया, समस्या पहिचान तथा तत्काल सहयोग व्यवस्था जस्ता गतिविधिहरूले महिलामा अधिकारबोध र आत्मविश्वास वृद्धि भएको छ। “पहिले उजुरी गर्न डराउने महिलाहरू आज खुलेर सहायता खोज्न आउन थालेका छन्। यो ठूलो परिवर्तनको संकेत हो,” उनले भनिन्।
वडामा बनेको सुशासन समितिले घरेलु हिंसा, मनोवैज्ञानिक अत्याचार तथा कानुनी प्रक्रियाबारे सचेतना कार्यक्रम नियमितरूपमा सञ्चालन गर्दै आएको छ। यसका कारण महिलाले आफ्नो आवाज बुलन्द गर्न सुरु गरेका छन् भने धेरै घर–परिवारमा संवाद र सहमति–आधारित समाधान पनि बढेको छ।
स्थानीय सरकारका अनुसार महिला लक्षित योजनाहरू अब कागजमै सीमित छैनन्, व्यवहारमै परिणाम देिरहेका छन्। महिला उद्यमशीलता तालिम, आत्मरक्षा प्रशिक्षण, समुदाय–स्तरमा समस्या समाधान कक्ष र विद्यालयहरूमा लैङ्गिक समानतासम्बन्धी सन्देशले सकारात्मक वातावरण सिर्जना गरेको छ।
“महिला सुरक्षालाई केन्द्रमा राखेर काम गर्दा समुदायमा विश्वास बढेको छ,” वडाका अधिकारीहरूले बताएका छन्।
विशेषगरी आर्थिक रूपमा निर्भर महिलाहरूलाई सशक्त बनाउन सुरु गरिएका सीपमूलक कार्यक्रम प्रभावकारी बनेका छन्। केही महिलाले साना व्यवसाय खोल्न सफल भएका छन् भने युवतीहरूले दक्षता विकास तालिमबाट रोजगारीमा पहुँच बढाएका छन्।
सकारात्मक परिवर्तन देखिँदै गएपछि वडाले आगामी वर्षमा महिला स्वास्थ्य, उद्यम विकास तथा कानुनी सशक्तीकरण क्षेत्रमा थप कार्यक्रम विस्तार गर्ने योजना बनाएको छ।
बुढानिलकण्ठ–३ मा सुरु भएको यो परिवर्तनले स्थानीय शासन, समानता र महिला मर्यादाको नयाँ आशा जगाएको छ।
