रुपन्देही :-तिलोत्तमा नगरपालिकाको आयोजनामा अन्तर वडा स्तरीय क्रिकेट प्रतियोगिता सञ्चालन हुने भएको छ। तिलोत्तमा नगर खेलकुद विकास समितिको आयोजना तथा व्यवस्थापनमा हुने उक्त प्रतियोगिता तिलोत्तमा नगरपालिकाका सबै वडाको सहभागितामा सञ्चालन गर्न लागिएको हो।
नगर कार्यपालिकाको कार्यालयले सम्पूर्ण वडा कार्यालयहरूलाई पत्राचार गर्दै तोकिएको मिति, समय र स्थानमा खेलाडीको सहभागिताका लागि आवश्यक समन्वय गर्न अनुरोध गरेको छ। प्रतियोगिता २०८२ पुष १५ गते बिहान १० बजेदेखि सुरु हुने छ भने खेलहरू वडा नं. १७ स्थित Extratech Oval International Cricket Stadium मा सञ्चालन हुनेछन्।
प्रतियोगितामा सहभागी हुन इच्छुक टोलीहरूले २०८२ पुष १० गते बेलुका ४ बजेसम्म दर्ता गरिसक्नुपर्नेछ। प्रत्येक टोलीमा १४ जना खेलाडी र १ जना टिम म्यानेजर वा टिम कोच गरी जम्मा १५ जनाको नाम दर्ता गर्नुपर्ने व्यवस्था गरिएको छ।
आयोजकका अनुसार प्रतियोगिता leather/dues ball बाट खेलाइनेछ र खेलहरू २० ओभरको हुनेछ। प्रत्येक दिन नकआउट प्रणालीमार्फत २ वटा खेल सञ्चालन गरिनेछ। सहभागी खेलाडीहरूले सम्बन्धित वडाको स्थायी बासिन्दा भएको प्रमाण खुल्ने कागजात अनिवार्य रूपमा पेश गर्नुपर्नेछ।
प्रतियोगितामा प्रथम हुने टोलीलाई नगद ७० हजार रुपैयाँ, द्वितीय हुने टोलीलाई ५० हजार रुपैयाँ पुरस्कार प्रदान गरिनेछ। साथै म्यान अफ द सिरिज, बेस्ट ब्याट्सम्यान र बेस्ट बलरलाई जनही ५ हजार रुपैयाँ नगद पुरस्कार प्रदान गरिने आयोजकले जनाएको छ।
खेल सञ्चालनका क्रममा कुनै विवाद उत्पन्न भएमा आयोजकको निर्णय अन्तिम हुने बताइएको छ। खेल ICC नियमअनुसार सञ्चालन गरिनेछ भने खेलाडीहरूको प्राथमिक उपचार बाहेक अन्य स्वास्थ्य सेवा उपलब्ध नहुने जानकारी पनि दिइएको छ।
थप जानकारीका लागि अर्जुन यादव र धनी प्रसाद शर्माको सम्पर्क नम्बर सार्वजनिक गरिएको नगरपालिकाले जनाएको छ।
