बुटवल :- रुपन्देही क्षेत्र नम्बर १ मा नेकपा एमालेका उम्मेदवार दधिराम न्यौपाने ले आफ्नो घरदैलो अभियान मार्फत मतदातासँग प्रत्यक्ष संवाद गर्दै क्षेत्रीय विकास र समृद्धिको प्रतिबद्धता दोहोर्याएका छन्।
देवदह–९ र १० का बस्तीहरूमा आयोजित भेटघाटमा न्यौपानेले ऐतिहासिक, सांस्कृतिक र पुरातात्विक सम्पदाको संरक्षण र प्रवर्द्धनमा जोड दिँदै शिक्षा, स्वास्थ्य, कृषि, पूर्वाधार र रोजगारी सिर्जना क्षेत्रलाई प्राथमिकता दिने स्पष्ट पारे।
उहाँले मतदातालाई सूर्यचिन्हमा मतदान गर्न आग्रह गर्दै भन्नुभयो, “लोकतन्त्र सुदृढ बनाउन, समाजवाद उन्मुख समृद्ध समाज निर्माण गर्न नेकपा एमालेसँगै अघि बढ्नु अपरिहार्य छ।”
उम्मेदवार न्यौपानेले बुटवल–धागो कारखाना, चरेङ्गे, पाल्पाको चौकीभ्याङ्ग जोड्ने सडक परियोजना, क्षेत्रीय पूर्वाधार विकास र यातायात सुधारलाई आफ्नो पहिलो प्राथमिकता बनाउने योजना सार्वजनिक गर्नुभयो। साथै, सुकुम्बासी समस्या, फोहोर व्यवस्थापन र सुरक्षा सुनिश्चित गर्न पनि पार्टी प्रतिबद्ध रहेको बताए।
घरदैलो कार्यक्रममा पार्टीका केन्द्रीय सचिव छविलाल विश्वकर्मा, संविधान सभा सदस्य विनोद पहारी, केन्द्रीय अनुशासन आयोग सचिवालय सदस्य डा. कृष्णप्रसाद न्यौपाने, प्रदेश सदस्य जानकी न्यौपाने, जिल्ला अध्यक्ष यज्ञ गैरे लगायत नेताहरूको उपस्थितिले अभियानलाई बलियो बनाएको थियो।
उम्मेदवार न्यौपानेले मतदातासँगको संवादमा प्रत्यक्ष समस्या, सुझाव र गुनासालाई सुन्ने र समाधानका उपाय अघि बढाउने आफ्नो प्रतिवद्धता दोहोर्याए। “रुपन्देही–१ को विकास केवल चुनावी वाचा होइन, निरन्तर र दीगो प्रयासद्वारा सम्भव छ। हामी सबै मिलेर यहाँको समग्र विकासको मार्ग तय गर्न सक्छौं,” उनले भने।
यसरी, दधिराम न्यौपानेको घरदैलो अभियानले प्रत्यक्ष संवादमार्फत मतदातामा विश्वास सिर्जना गर्दै नेकपा एमालेको समग्र विकास एजेन्डालाई प्रभावकारी रूपमा प्रस्तुत गरेको छ।
