बुटवल, रुपन्देही:- लियो क्लब अफ बुटवल गोल्डेन जुब्लीले सञ्चालन गरेको सिग्नेचर प्रोजेक्ट “सबैका लागि शिक्षा” अन्तर्गत बुलिङटार गाउँपालिका–६ का आर्थिक रूपमा कमजोर तथा अध्ययनमा अग्रणी १०० जना विद्यार्थीलाई शैक्षिक सामग्री वितरण गरेको छ।
क्लबले सामाजिक उत्तरदायित्व अन्तर्गत प्रत्येक वर्ष लक्षित समुदायका विद्यार्थीलाई सहयोग गर्ने उद्देश्य राख्दै आएको छ। यस वर्षको कार्यक्रमअन्तर्गत विद्यार्थीहरूलाई कपी, कलम, पेन्सिल, इरेजर, कटर तथा ‘भविष्य बोक्ने झोला’ वितरण गरिएको क्लबले जानकारी दिएको छ। 
पाँच विद्यालय समेटिए शैक्षिक सहायता कार्यक्रम निम्न विद्यालयहरूमा सम्पन्न गरिएको थियो जस्मा निम्न विद्यालय रहेका छन्।श्री शिव माध्यमिक विद्यालय, अत्रौली,विष्णु उदय प्राथमिक विद्यालय, शीतलपुर,कामधेनु प्राथमिक विद्यालय, घुमारी,शिशु आश्रम प्राथमिक विद्यालय, धबाहा ,रामशाह प्राथमिक विद्यालय, भारतीपुर रहेका थिए।
क्लबका पदाधिकारीका अनुसार सामग्री वितरणका क्रममा विद्यार्थी, शिक्षक र अभिभावकहरूले उत्साहपूर्वक सहभागिता जनाएका थिए।
“झोला मात्र होइन, भविष्यको बोझ बोक्ने आधार” — अध्यक्ष श्रेष्ठ
क्लबका अध्यक्ष लियो अशोक श्रेष्ठ (२०२५/२६) ले विद्यार्थीको भविष्यमा लगानीलाई सबैभन्दा ठूलो सेवा बताउँदै भने—
“हामीले वितरण गरेको झोला केवल कापी–कलम राख्ने साधन मात्र होइन, विद्यार्थीहरूको भविष्य बोक्ने आधार हो। उनीहरूले आफ्नो लक्ष्य प्राप्तिमा सफल होऊन् भन्ने हाम्रो अपेक्षा छ।”
यस परियोजना सफल बनाउन सहयोग गर्ने दाताहरू, स्थानीय समुदाय, शिक्षक तथा क्लब सदस्यहरूलाई क्लबले कृतज्ञता व्यक्त गरेको छ।
सामुदायिक स्कूलहरूमा शैक्षिक सामग्री अभावले विद्यार्थीको सिकाइमा प्रभाव पर्ने भएकाले यस्तो सहयोगले स्थानीय स्तरमा शिक्षा पहुँच र प्रेरणा बढाउने अपेक्षा गरिएको छ।
लियो क्लब अफ बुटवल गोल्डेन जुब्लीले आगामी दिनमा पनि शिक्षा, स्वास्थ्य र सामाजिक विकासका क्षेत्रमा निरन्तर योगदान गर्दै जाने जनाएको छ।
