काठमाडौं :-सार्वजनिक यातायात नागरिकको दैनिक जीवनसँग प्रत्यक्ष जोडिएको सेवा हो। तर राजधानीको उत्तरी क्षेत्र बुढानीलकण्ठमा व्यवस्थित बस पार्कको अभावले यातायात सेवा सञ्चालन दिनप्रतिदिन चुनौतीपूर्ण बन्दै गएको छ। यात्रुको संख्या बढ्दै गए पनि त्यसअनुसार आवश्यक पूर्वाधार विकास हुन नसक्दा यात्रु, चालक र व्यवसायी सबै प्रभावित बनेका छन्।
बुढानीलकण्ठ, दशन क्षेत्र तथा आसपासका स्थानहरूमा दैनिक हजारौं सर्वसाधारण सार्वजनिक यातायात प्रयोग गरेर आवतजावत गर्छन्। नेपालका विभिन्न जिल्लादेखि विदेशी पर्यटकसमेत बुढानीलकण्ठ दर्शनका लागि आउने गर्छन्। तर बस पार्कको अभावका कारण सवारी साधनहरूलाई व्यवस्थित रूपमा राख्न नसक्दा सडक नै अस्थायी पार्किङस्थल बन्न पुगेको छ।
यसले ट्राफिक व्यवस्थापनमा समस्या सिर्जना गर्नुका साथै यात्रुलाई समेत सास्ती खेप्न बाध्य बनाएको छ। विशेषगरी व्यस्त समयमा यात्रु चढाउने र ओराल्ने क्रममा सडकमा जाम बढ्ने र दुर्घटनाको जोखिमसमेत रहने गरेको स्थानीयहरू बताउँछन्।
बुढानीलकण्ठ यातायात प्रालिका अध्यक्ष लक्ष्मण थापाका अनुसार अहिलेको सबैभन्दा ठूलो समस्या नै बस पार्कको अभाव हो। उनका अनुसार सवारी साधनको पालो व्यवस्थापनदेखि यात्रु सेवा सञ्चालनसम्म प्रत्यक्ष असर परेको छ।
“व्यवस्थित बस पार्क नहुँदा सेवा सञ्चालनमा धेरै कठिनाइ भएको छ। बाध्य भएर सडकमै सवारी साधन राख्नुपर्ने अवस्था छ। यसबाट यात्रु र व्यवसायी दुवै प्रभावित भएका छन्। सम्बन्धित निकायसँग समन्वय गरेर दीर्घकालीन समाधान खोज्ने प्रयास गरिरहेका छौं,” अध्यक्ष थापाले भने।
बस पार्कको अभावले चालक र सहचालकलाई मात्र होइन, बुढानीलकण्ठ दर्शनका लागि नेपालका विभिन्न स्थान तथा विदेशबाट आउने भक्तजनलाई समेत असहज बनाएको छ। सुरक्षित प्रतीक्षास्थल नहुँदा यात्रुहरू सडक छेउमै बसको प्रतीक्षा गर्न बाध्य छन्।
विशेषगरी बिहान कार्यालय समय र साँझ घर फर्किने समयमा समस्या अझ गम्भीर बन्ने गरेको छ। स्थानीय बासिन्दाले पनि बढ्दो सवारी चाप र अव्यवस्थित पार्किङका कारण दैनिक रूपमा सास्ती खेप्नुपरेको गुनासो गरेका छन्।
सार्वजनिक यातायातलाई व्यवस्थित, सुरक्षित र प्रभावकारी बनाउन पूर्वाधार विकास अपरिहार्य मानिन्छ। बस पार्क केवल सवारी साधन राख्ने स्थान मात्र नभई यात्रु सेवा व्यवस्थापनको महत्वपूर्ण आधार पनि हो। त्यसैले बुढानीलकण्ठ क्षेत्रमा आधुनिक र व्यवस्थित बस पार्क निर्माण आजको आवश्यकता बनेको सरोकारवालाहरूको भनाइ छ।
बढ्दो शहरीकरणसँगै सार्वजनिक यातायातको माग पनि निरन्तर बढिरहेको छ। यस्तो अवस्थामा सम्बन्धित निकायले समयमै दीर्घकालीन योजना बनाएर बस पार्क निर्माणमा ध्यान दिन सके यात्रुले सहज, सुरक्षित र गुणस्तरीय सेवा पाउने अपेक्षा गरिएको छ। अन्यथा बस पार्कको अभावले सिर्जना गरेको समस्या अझ जटिल बन्दै जाने देखिन्छ।
