रुपन्देही :-रुपन्देहीको तिलोत्तमा नगरपालिकाले जापानमा आयोजना हुन लागेको एशिया स्मार्ट सिटी कन्फरेन्स २०२५ मा सहभागी हुन अनधिकृत कागजात तयार गरेको आरोपमा कम्प्युटर अपरेटर सञ्जु पौडेललाई बर्खास्त गरेको छ।
बुधबार बसेको नगर प्रमुखस्तरीय बैठकले पौडेललाई पदमुक्त गर्ने निर्णय गरेको हो। नगरप्रमुख रामकृष्ण खाँणका अनुसार, पौडेलले कार्यालयको स्वीकृति र समन्वयबिना नै जापान भ्रमणका लागि अनधिकृत रूपमा कागजात तयार पारेकी थिइन्।
उक्त भ्रमणमा स्वास्थ्य शाखाका केशव भट्टराई र योजना शाखाकी सीता भण्डारी भुसाल पनि सिफारिसमा परेका थिए। तर, पौडेलको सिफारिसमा शंका उठेपछि नगरपालिकाले आन्तरिक छानबिन थालेको थियो।
छानबिनपछि पौडेलले फर्जी कागजात तयार पारेको पुष्टि भएपछि उनलाई तत्काल प्रभावले बर्खास्त गरिएको नगरप्रमुख खाँणले जानकारी दिएका छन्।
नगरपालिकाका प्रमुख प्रशासकीय अधिकृत खुमलाल भुसालका अनुसार,:- “सम्मेलनमा सहभागी हुने तीनै जनाको भ्रमण २३ कात्तिकमै रद्द गरिएको थियो। आयोजक संस्थाबाट भ्रमण रद्द भएको पुष्टि २४ कात्तिकमा इमेलमार्फत प्राप्त भएको थियो,”
उनले बताए।
नगरपालिकाले जारी गरेको विज्ञप्तिमा भनिएको छ :- “अनधिकृत रूपमा कार्यालयको कागजात प्रयोग गरेको पाइएकी करार सेवाकी कम्प्युटर अपरेटर सञ्जु पौडेललाई २६ कात्तिकदेखि लागू हुनेगरी बर्खास्त गरिएको छ।”
यो घटनाले स्थानीय निकायमा आन्तरिक प्रशासनिक पारदर्शिता र कागजात प्रमाणीकरण प्रणालीप्रति गम्भीर प्रश्न उठाएको छ।
