काठमाडौं:- नेकपा एमालेकी उपाध्यक्ष अष्टलक्ष्मी शाक्यले अब आफू कुनै पनि चुनाव नलड्ने स्पष्ट पारेकी छन्।
आइतबार भृकुटीमण्डपमा बसेको पार्टीको केन्द्रीय कमिटी बैठकमा बोल्दै उनले भनिन्, “म अब चुनाव उठ्दिनँ। मलाई भोट हाल्नु पर्दैन। तर पार्टी बलियो बनाउने काममा मेरो प्रयत्न निरन्तर रहन्छ।”
उनले पार्टी सञ्चालन विधि र विधानअनुसार हुनुपर्नेमा जोड दिँदै नेताहरूले फराकिलो सोच राख्नुपर्ने बताइन्। “विधि र विधानसम्मत रूपमा अघि बढौँ। नेताहरूले फराकिलो मन बनाऔँ र पार्टीलाई नीति–प्रधान बनाऔँ। मुख्य कुरा विधि नै हो,” उनले भनिन्।
उपाध्यक्ष शाक्यले अध्यक्ष केपी शर्मा ओलीसँग भएको पुरानो संवाद पनि स्मरण गरिन्। “७० वर्ष पुगेपछि म सक्रिय जिम्मेवारीमा नबस्ने कुरा गरेको थिएँ। त्यसबेला अध्यक्ष कमरेडले ‘सँगै बिदा लिऔँला’ भन्नुभएको थियो,” उनले भनिन्।
आफू नभए पार्टी चल्दैन भन्ने सोचबाट मुक्त हुनुपर्ने उल्लेख गर्दै उनले पार्टी व्यक्तिमा होइन, प्रणालीमा आधारित हुनुपर्ने धारणा राखिन्। साथै, आम जनताको चासो र चाहनालाई बेवास्ता गर्दै विधान संशोधनतर्फ जानु उचित नहुने उनको भनाइ थियो।
उनको अभिव्यक्तिलाई एमालेभित्र नेतृत्व हस्तान्तरण, विधिको सम्मान र संस्थागत राजनीतितर्फको संकेतका रूपमा हेरिएको छ।
