बुटवल :- बुटवल उपमहानगरपालिकाले सडक अतिक्रमण हटाउने तथा बजारलाई व्यवस्थित बनाउने अभियानलाई निरन्तरता दिएको छ। पहिलो र दोस्रो दिन कडाइका साथ अघि बढाइएको अभियान तेस्रो दिन भने केही नरम रूपमा सञ्चालन गरिएको देखिएको छ।
नगरपालिकाले पहिलो दिन अस्पताल लाइन, भुड्की चोक र मिलन चोक क्षेत्रमा अनुगमन गरेको थियो। सो क्रममा भुड्की चोकमा सडक पेटी अतिक्रमण गरी व्यापार गरिरहेका केही व्यवसायीका संरचना हटाइएका थिए भने मिलन चोक क्षेत्रमा सडकमै राखिएका मोटरसाइकल र सामान नियन्त्रणमा लिइएको थियो।
दोस्रो दिन अमरपथ, राममन्दिर लाइनलगायतका क्षेत्रमा अनुगमन गर्दा नगर प्रहरी र व्यवसायीबीच केही तनावको अवस्था समेत सिर्जना भएको थियो।
अनुगमन टोलीमा नगर प्रमुख खेलराज पाण्डे, उपप्रमुख सावित्रादेवी अर्याल, प्रमुख प्रशासकीय अधिकृत दीपक ज्ञवाली लगायतको सहभागिता रहेको थियो। व्यवसायीहरूले प्रतिरोध जनाएपछि नगर प्रहरीले केही स्थानमा सामान नियन्त्रणमा लिएको थियो।
तेस्रो दिन भने नगर प्रमुख पाण्डेले आवश्यकता अनुसार कडाइ र सहजीकरण दुबै अपनाइने बताउँदै अभियानको उद्देश्य कसैलाई दुःख दिनु नभई सहरलाई व्यवस्थित बनाउनु रहेको स्पष्ट पारे। “हामीले सूचना र माइकिङमार्फत पहिले नै जानकारी गराएका थियौँ, अटेरी गरेपछि मात्रै कडाइ गर्नुपरेको हो,” उनले भने।
नगरपालिकाका अनुसार १५ दिनअघि नै सूचना जारी गरेर फुटपाथ खाली गर्न आग्रह गरिएको थियो। त्यसपछि पनि अटेरी भएपछि डोजर र टोलीसहित अनुगमनमा निस्किनु परेको जनाएको छ। यो अभियान आगामी तीन महिनासम्म निरन्तर सञ्चालन हुने र त्यसपछि पनि नियमित अनुगमन जारी रहने बताइएको छ।
यद्यपि, केही व्यवसायीहरूले भने नगरपालिकाले कठोर र असहज शैली अपनाएको गुनासो गरेका छन्। उनीहरूले आफ्ना सामग्री हटाउने समय नदिई उठाएर लगिएको दाबी गरेका छन्। केहीले पसलभित्रसम्म प्रवेश गरी सामान उठाइएको आरोप पनि लगाएका छन्।
नगरपालिकाले भने उठाइएका सामानहरू सुरक्षित रूपमा गोदाममा राखिएको र अनुगमन सम्पन्न भएपछि विस्तृत विवरण संकलन गरी आवश्यक निर्णय गरिने जनाएको छ। उपप्रमुख अर्यालका अनुसार तेस्रो दिन धेरै व्यवसायीहरूले आफैं सामान हटाएकाले अवस्था सहज बनेको हो।
