मोरङ :- मोरङको बुढीगंगा गाउँपालिका–२ मा १ अर्ब रुपैयाँभन्दा बढी लगानीमा अन्तर्राष्ट्रिय मापदण्डको सलाइन उत्पादन उद्योग सञ्चालनमा आएको छ। एलेक्सा लाइफसाइन्सेज नामक उक्त उद्योगले स्वास्थ्य क्षेत्रमा नेपाललाई आत्मनिर्भर बनाउने लक्ष्यसहित उत्पादन सुरु गरेको हो।
उद्योगको उद्घाटन वरिष्ठ मुटु रोग विशेषज्ञ डा. भगवान कोइराला ले एक कार्यक्रमबीच गरेका हुन्। जर्मन प्रविधिको अत्याधुनिक मेसिनरी प्रयोग गरी सञ्चालनमा ल्याइएको उद्योगले विश्वस्तरीय गुणस्तरको सलाइन उत्पादन गर्ने दाबी गरेको छ।
उद्योगी दिनेश ठाकुर र रञ्जित भगतको करिब पाँच वर्ष लामो अध्ययन र निरन्तर प्रयासपछि यो परियोजना सफल भएको जनाइएको छ। उद्घाटन कार्यक्रममा बोल्दै डा. कोइरालाले स्वदेशमै अत्यावश्यक औषधि उत्पादन हुनु राष्ट्रका लागि गौरवको विषय भएको बताए।
“औषधिका लागि विदेशमा निर्भर भइरहेका बेला स्वदेशमै यस्तो उद्योग खुल्नु सकारात्मक कदम हो,” उनले भने, “गुणस्तरमा सम्झौता नगरी निरन्तरता दिन सके यसले स्वास्थ्य क्षेत्रमा ठूलो योगदान पुर्याउँछ।”
हाल उद्योगले पहिलो चरणमा ‘लार्ज भोल्युम प्यारेन्टरल्स’ अन्तर्गत १०० एमएलदेखि ३००० एमएलसम्मका सलाइन उत्पादन सुरु गरिसकेको छ।
उद्योगका निर्देशक ठाकुरका अनुसार:
दोस्रो चरणमा १–२० एमएलसम्मका ‘स्मल भोल्युम प्यारेन्टरल्स’ (इन्जेक्सन)
तेस्रो चरणमा आँखा तथा कानमा प्रयोग हुने औषधि उत्पादन गर्ने लक्ष्य राखिएको छ।
गुणस्तरीय उत्पादनका बाबजुद उद्योगले सुरुवातमै आर्थिक चुनौती सामना गरिरहेको जनाएको छ। उत्पादन लागत उच्च भए पनि बजार मूल्य समायोजन नहुँदा हाल घाटा सहेरै सञ्चालन गर्नुपरेको ठाकुरको भनाइ छ।
“हाम्रो उद्देश्य सहज मूल्यमा गुणस्तरीय औषधि उपलब्ध गराउनु हो, तर नीतिगत असहजताले चुनौती थपेको छ,” उनले भने।
उनले स्वदेशी उद्योगलाई जोगाउन सरकारबाट नीतिगत सुधार र सहुलियत आवश्यक रहेकोमा जोड दिए।
उद्योगले हाल १५० भन्दा बढीलाई प्रत्यक्ष रोजगारी दिएको छ। दक्ष जनशक्ति र आधुनिक व्यवस्थापन प्रणालीसहित सञ्चालन भइरहेको कम्पनीले भविष्यमा आफ्ना उत्पादन अन्तर्राष्ट्रिय बजारमा निर्यात गर्ने योजना पनि अघि सारेको छ।
नेपालको औषधि बजारमा विदेशी कम्पनीहरूको वर्चस्व रहँदै आएको अवस्थामा एलेक्सा लाइफसाइन्सेजको प्रवेशलाई आयात प्रतिस्थापनतर्फ महत्वपूर्ण कदमका रूपमा हेरिएको छ।
