चितवन :- चितवनस्थित मालपोत कार्यालय भरतपुरमा अनधिकृत रूपमा प्रवेश गर्ने १६ जना व्यक्तिलाई प्रहरीले पक्राउ गरेको छ। सेवाग्राहीलाई झुक्याउने तथा ठगी गर्ने गुनासो बढेपछि कार्यालयले कडाइका साथ यस्तो कदम चालेको हो।
कार्यालयले एक सूचना जारी गर्दै अबदेखि अनधिकृत व्यक्तिहरूको प्रवेशमा पूर्ण रोक लगाइएको जनाएको छ। सेवाग्राहीलाई सेवा प्रदान गर्ने क्रममा केही व्यक्तिहरूले कार्यालय परिसरमा प्रवेश गरी गलत जानकारी दिने, झुक्याउने तथा आर्थिक ठगी गर्ने गतिविधि बढेपछि निगरानी कडा बनाइएको हो।
कार्यालयका अनुसार अब सेवा लिन आउने सम्बन्धित व्यक्तिहरू र कानुन बमोजिम दर्ता भएका भू–सेवा सञ्चालकहरूलाई मात्र कार्यालय परिसरमा प्रवेश दिइनेछ। सेवासम्बन्धी सम्पूर्ण काम कारबाही पनि सम्बन्धित व्यक्तिले पेश गरेको निवेदन तथा दर्ता भएका भू–सेवा सञ्चालकहरूले पेश गरेका कागजातका आधारमा मात्र अघि बढाइने स्पष्ट पारिएको छ।
त्यस्तै, भू–सेवा सञ्चालकहरूले कार्यालय प्रवेश गर्दा अनिवार्य रूपमा आफ्नो परिचयपत्र साथमा ल्याउनुपर्ने व्यवस्था गरिएको छ।कार्यालयले सेवाग्राहीहरूलाई अनधिकृत व्यक्तिको भर नपर्न, कुनै पनि काम आधिकारिक माध्यमबाट मात्र गर्न र सचेत रहन आग्रह गरेको छ।
