रुपन्देही :- रुपन्देही–२ बाट नेपाली कांग्रेसका प्रतिनिधि सभा सदस्य पदका उम्मेदवार चुन्नप्रसाद शर्मा पौडेलले मतदान गरेका छन् ।
उनले बुटवल उपमहानगरपालिका–४ स्थित कान्ति माध्यमिक विद्यालयको मतदान केन्द्रमा पहिलो मत खसाल्दै आफ्नो मतदान अधिकार प्रयोग गरेका हुन् ।
बिहानै मतदान केन्द्रमा पुगेका उम्मेदवार शर्मा मतदानपछि उत्साहित देखिएका थिए । सञ्चारकर्मीसँग संक्षिप्त प्रतिक्रिया दिँदै उनले लोकतन्त्रको उत्सवमा सहभागी हुन आम मतदातालाई उत्साह, आशा र भरोसाका साथ मतदान गर्न अपिल गरे ।
उनले निर्वाचन भयरहित, निष्पक्ष र शान्तिपूर्ण वातावरणमा सम्पन्न हुने विश्वास व्यक्त गर्दै निर्वाचन प्रक्रियामा खटिएका कर्मचारी, सुरक्षाकर्मी तथा निर्वाचन आयोगको टोलीप्रति आभार व्यक्त गरे । “जनताको मत नै सर्वोच्च शक्ति हो, त्यसैले सबै मतदाताले निर्धक्क भएर आफ्नो अधिकार प्रयोग गर्नुहोस्,” उनले भने ।
