काठमाडौँ :- राष्ट्रिय स्वतन्त्र पार्टी (रास्वपा) र विवेकशील साझा पार्टीबीच आज काठमाडौँको भृकुटीमण्डपस्थित राष्ट्रिय सभा गृहमा औपचारिक एकता घोषणा गरिएको छ। दुवै दलका तर्फबाट रास्वपाका कार्यवाहक सभापति डिपी अर्याल र विवेकशील साझाकी अध्यक्ष समीक्षा बास्कोटाले एकता कागजमा हस्ताक्षर गरेका छन्।
एकता घोषणासँगै विवेकशील साझाले आफ्नो विपद व्यवस्थापन कोषमा रहेको ३३ लाख रुपैयाँ रास्वपालाई हस्तान्तरण गरेको छ। विवेकशील साझाले बिना शर्त रास्वपाको सिद्धान्त, नेतृत्व, नाम र चुनाव चिन्ह ‘घण्टी’ स्वीकार गर्दै समाहित भएको जनाएको छ।
यसअघि रास्वपाको केन्द्रीय समिति बैठकले विवेकशील साझासँग एकता प्रस्ताव स्वीकृत गरेको थियो भने विवेकशील साझाको केन्द्रीय बैठकले गत बुधबार नै रास्वपासँग एकता गर्ने निर्णय गरेको थियो।
एकताका मुख्य बुँदाहरू
रास्वपाको राजनीतिक सिद्धान्त, नेतृत्व र चुनाव चिन्ह ‘घण्टी’ पूर्ण रूपमा स्वीकार्ने।
स्व. उज्वल थापाको ‘विवेकशील अभियान’ ले वैकल्पिक राजनीतिमा पुर्याएको योगदानलाई दस्तावेजीकरण गरी मान्यता दिने।
आगामी पहिलो राष्ट्रिय महाधिवेशनसम्म संघीय नेतृत्व मञ्च गठन गरिने र विवेकशील साझा पार्टीबाट आएका नेताहरूलाई समान हैसियतमा समायोजन गरिने।
पार्टी संरचनामा समायोजन गर्दा योग्यता, समावेशिता र सार्वजनिक छविलाई प्राथमिकता दिने।
दलको नाम ‘राष्ट्रिय स्वतन्त्र पार्टी’ र चुनाव चिन्ह ‘घण्टी’ नै कायम रहने।
एकतासम्बन्धी सबै कानूनी प्रक्रिया, सम्पत्ति व्यवस्थापन र दस्तावेज तयारी दुवै दलले आपसी समझदारीमा अघि बढाउने।
वैकल्पिक राजनीतिक धारमा रहेका अन्य समूह र व्यक्तिहरूलाई पनि एकीकृत मोर्चामा आउन आव्हान गर्ने।
एकताले ल्याउने प्रभाव
विशेषज्ञहरूका अनुसार यो एकताले वैकल्पिक राजनीतिक शक्तिलाई बलियो मात्र बनाउने होइन, युवा पुस्ता केन्द्रित नयाँ राजनीतिक वातावरण निर्माण गर्ने सम्भावना बढाएको छ। दुवै दलको संरचना, सोच र मतदाताको आधार समान प्रकृतिको भएकाले एकता व्यावहारिक र प्रभावकारी हुने विश्लेषण गरिएको छ।
विवेकशील साझाको प्रवेशसँगै रास्वपाभित्र नीति निर्माणदेखि संगठन विस्तारसम्म नयाँ ऊर्जा, विविध विचार र परिपक्वता थपिने अपेक्षा व्यक्त गरिएको छ।
अभियानलाई विस्तार गर्ने घोषणा
दुवै दलले एकतापछि लोकतान्त्रिक सुशासन, पारदर्शिता, अनुशासन र वैकल्पिक राजनीतिलाई संस्थागत गर्न सामूहिक अभियान सञ्चालन गर्ने बताएका छन्। साथै अन्य वैकल्पिक ताकतालाई पनि एउटै छातामुनि ल्याउने दाबी गरेका छन्।
यो एकता नेपाली राजनीतिमा विखण्डित वैकल्पिक धारलाई एकीकृत दिशातर्फ अघि बढाउने महत्वपूर्ण कदम मानिएको छ।
