गुल्मीः चन्द्रकोट गाउँपालिकाले बाँदरलाई नियन्त्रणमा लिनका लागि खोर निर्माण गरेको छ ।
किसानहरुले लगाएको अन्नबाली बाँदरले सखाप पार्न थालेपछि बाँदरलाई नियन्त्रण गर्नका लागि खोर निर्माण गरिएको उपाध्यक्ष बिष्णुप्रसाद भण्डारीले जानकारी दिनुभएकाे हाे ।बाँदर खोरमा पसेपछि डराउन सक्ने र अन्य बाँदरहरु डरले नआउने संभावना बलियो भएकाले यस्तो अभियान सुरु गरिएको गाउँपालिकाले जनाएको छ ।
एक एक वटा बाँदरहरु खोरमा रहँदा प्रजननमा वृद्धि नहुँने भएकाले बाँदरको संख्या वृद्धि कम गर्न सकिने भएकाले यो विधि उत्तम रहने गाउँपालिकाका अध्यक्ष युवराज केशीले दाबी गर्नुभयो । बाँदरलाई मार्ने कानून नभएकाले उनीहरुलाई खोरमा थुन्ने र आहाराको ब्यबस्था गर्नु नै उत्तम विकल्प भएको उहाँको भनाई छ ।
किसानहरुले लगाएको अन्नबाली जंगली जनावरहरु र बाँदरले नष्ट गरिदिएपछि किसानको अन्नबाली संरक्षण गर्नका लागि पालिकाले हदैसम्मका उपायहरु अपनाउने पालिकाले जनाएको छ ।
बाँदरकै कारण बसाइँसराइँको दरपनि बढ्दै गएको बताउँदै गाउँपालिकाका प्रबक्ता घनश्याम खरेलले खोरको उपलब्धी कति हुन्छ त्यो परीक्षणमै रहेको बताउनुभयो । यदि यो सफल भए पालिकाभर अभियानकै रुपमै चलाइने खरेलको दाबी छ । चन्द्रकोट गाउँपालिका वडा नम्वर तीन हर्राचौरमा एक लाखको बजेटबाट अहिले पाँच वटा खोर निर्माण गरिएको छ ।
यता धुर्कोट गाउँपालिकाका अध्यक्ष भूपाल पोखरेलले बाँदर मार्न पाउनुपर्ने कानून निर्माण गर्नुपर्नेमा जोड दिनुभयो । संघिय सरकारले किसानको समस्यालाई मध्यनजर गर्दै समस्या समाधान गर्नका लागि बाँदर मार्न पाउनुपर्ने कानुन निर्माण गर्नुपर्ने बताउनुभयो ।
कानून अभावका कारण बाँदर मार्न नसकिए बाँदरलाई छोपेर घरघरमा पाल्नुपर्ने उहाँको धारण छ ।
यस अघि जिल्ला समन्वय समिति गुल्मीको जिल्ला सभामा पनि बाँदरलाई नियन्त्रण गर्ने बिषयमा चर्चा चलेको थियो । जसका लागि कानून निर्माण गर्न संघिय सरकारलाई आग्रह गर्ने र बाँदर मार्न पाउनुपर्ने आवाज स्थानीय सरकारहरुले गरेका थिए ।
