पाल्पा :- ‘पुस्ता विभाजन होइन, पुस्ताबीच सहकार्य’को अवधारणासहित युवा नेता श्रीधर बस्यालले नेपाली कांग्रेसको १५औँ महाधिवेशनमा पाल्पा क्षेत्र नं. २ बाट युवा तर्फ महाधिवेशन प्रतिनिधि पदमा उम्मेदवारी प्रस्तुत गरेका छन्। नयाँ पुस्ताको आवाजलाई पार्टीभित्र पुर्याउँदै अग्रजको अनुभव र युवाको ऊर्जाबीच समन्वय गर्ने एजेन्डासहित आफू अघि बढेको बस्यालले बताएका छन्।
पाल्पाको बगनासकाली गाउँपालिका–७, दैलातुङमा जन्मिएका बस्याल शिक्षा, सामाजिक सेवा र राजनीतिक गतिविधिमा सक्रिय रहँदै आएका छन्। स्वास्थ्य, शिक्षा र खेलकुदलगायतका सामाजिक गतिविधिमार्फत समुदायसँग जोडिँदै आएका उनले राजनीति चुनावका बेला मात्रै नभई नागरिकको दैनिक जीवन र समस्यासँग निरन्तर जोडिनुपर्ने धारणा राखेका छन्।
२०७० सालको निर्वाचनदेखि नेपाली कांग्रेसको विचार र राजनीतिक यात्राबाट प्रभावित भएर पार्टीमा सक्रिय रहेको बताउने बस्याल लामो समयदेखि नेपाल विद्यार्थी संघ (नेविसंघ)को राजनीतिमा समेत संलग्न छन्। विद्यार्थी राजनीतिमा हासिल गरेको अनुभवलाई पार्टीको मूल संगठन र नयाँ पुस्तासँग जोड्ने उद्देश्य आफ्नो रहेको उनको भनाइ छ।
३५ वर्षमुनिका बस्यालले आफ्नो उम्मेदवारीलाई केवल उमेर समूहको प्रतिनिधित्वमा सीमित नराखी जेन–जीसहित समग्र नयाँ पुस्ताका भावना, अपेक्षा र सम्भावनालाई कांग्रेसको नीति तथा संगठनसँग जोड्ने प्रयासका रूपमा प्रस्तुत गरेका छन्।
तर नयाँ पुस्तालाई अगाडि बढाउने नाममा अग्रजको योगदान र अनुभवलाई अलग गर्न नहुने उनको धारणा छ। कांग्रेसको इतिहास, लोकतान्त्रिक आन्दोलन र संगठन निर्माणमा योगदान पुर्याएका अग्रजको अनुभवसँग नयाँ पुस्ताको ऊर्जा र नवीन सोच जोडेर अघि बढ्नुपर्ने उनले बताएका छन्।
बीपी कोइरालाको लोकतन्त्र, राष्ट्रियता र समाजवादसम्बन्धी विचारलाई आफ्नो राजनीतिक आधार मान्ने बस्यालले कांग्रेससँगको आफ्नो सम्बन्धलाई भावनात्मक रूपमा समेत प्रस्तुत गरेका छन्।
“मलाई बोल्न सिकाउने, हिँड्न सिकाउने र आजको श्रीधर बन्न सिकाउने कांग्रेस नै हो। त्यसैले जीवन कांग्रेस भएर नजन्मिए पनि, कांग्रेस भएरै बाँच्ने मेरो प्रतिबद्धता हो,” बस्यालले भनेका छन्।
महाधिवेशन प्रतिनिधिमा निर्वाचित भए आफ्नो भूमिका महाधिवेशनमा मतदान गर्नेमै सीमित नराख्ने उनको प्रतिबद्धता छ। आगामी पाँच वर्ष पार्टी संगठन, स्थानीय समुदाय र नयाँ पुस्तासँग निरन्तर संवाद गर्दै काम गर्ने योजना उनले अघि सारेका छन्।
बस्यालले विशेषगरी नयाँ पुस्ताको आवाज पार्टीको नीति र निर्णय प्रक्रियासम्म पुर्याउने, अग्रजको अनुभवसँग युवाको ऊर्जा जोड्ने र चुनावबाहेकका समयमा समेत गाउँ तथा समुदायमा पुगेर नागरिकका समस्या सुन्ने विषयलाई प्राथमिकतामा राखेका छन्।
त्यस्तै शिक्षा, स्वास्थ्य, खेलकुद, सीप, उद्यमशीलता र रोजगारीका विषयमा युवा केन्द्रित पहल गर्ने उनको एजेन्डा छ। युवालाई केवल राजनीतिक गतिविधिमा परिचालन गर्नेभन्दा उनीहरूको शिक्षा, सीप र आर्थिक सम्भावनासँग पार्टीलाई जोड्नुपर्ने उनको धारणा छ।
संगठन सञ्चालनमा नियमित समीक्षा र संवादको अवधारणा पनि उनले अघि सारेका छन्। पाल्पा क्षेत्र नं. २ का वडा तथा स्थानीय तहमा प्रत्येक छ महिनामा भेटघाट र समीक्षा गर्दै संगठनको अवस्था बुझ्ने तथा नागरिक र कार्यकर्ताबाट सुझाव संकलन गर्ने अभ्यास अघि बढाउने बस्यालले बताएका छन्।
पाल्पाका विकास, पूर्वाधार, कृषि, पर्यटन, शिक्षा, स्वास्थ्य र रोजगारीका मुद्दालाई तथ्यका आधारमा प्रदेश तथा केन्द्रीय तहसम्म पुर्याउन पहल गर्ने उनको अर्को प्रतिबद्धता छ।
‘समाजका लागि कांग्रेस, कांग्रेसका लागि समाज’ भन्ने अवधारणासहित बस्यालले पार्टीलाई स्थानीय समुदायसँग अझ नजिक जोड्नुपर्ने बताएका छन्। नयाँ पुस्ताको आवाज, अग्रजको अनुभव र संगठनको शक्तिलाई एकै ठाउँमा जोडेर अघि बढ्नुपर्ने उनको भनाइ छ।
पाल्पा–२ बाट युवा महाधिवेशन प्रतिनिधिमा दाबी गरेका बस्यालले आफ्नो उम्मेदवारीको मूल सन्देश नेतृत्वमा पुस्तान्तरण मात्रै होइन, राजनीतिक संस्कार र कार्यशैलीमा समेत नवीनता आवश्यक रहेको बताएका छन्।
महाधिवेशन प्रतिनिधिका लागि अन्य उम्मेदवारहरूको दाबीसमेत सार्वजनिक भइरहेका बेला अन्तिम प्रतिस्पर्धाको स्वरूप भने उम्मेदवारी प्रक्रिया पूरा भएपछि स्पष्ट हुनेछ।
