काठमाडौं :- नेकपा एमालेका महासचिव शंकर पोखरेलले नेपाली कांग्रेसको १५औँ महाधिवेशनबाट गगनकुमार थापा सिंगो पार्टीको स्वीकार्य सभापतिका रूपमा स्थापित हुने विश्वास व्यक्त गरेका छन्।
आइतबार काठमाडौंको खुलामञ्चमा आयोजित कांग्रेसको १५औँ महाधिवेशन उद्घाटन समारोहलाई सम्बोधन गर्दै पोखरेलले विशेष महाधिवेशनबाट पार्टी नेतृत्वमा आएका थापालाई शुभकामना दिँदै यस्तो बताएका हुन्।
‘१५औँ राष्ट्रिय महाधिवेशनबाट सिंगो नेपाली कांग्रेसको स्वीकार्य सभापतिका रूपमा स्थापित हुनुहुन्छ भन्ने विश्वास र अपेक्षाका साथ शुभकामना व्यक्त गर्न चाहन्छु,’ पोखरेलले भने।
पोखरेलले विगतका राजनीतिक आन्दोलनमा कांग्रेस र वामपन्थी शक्तिबीच भएको सहकार्यको स्मरण गर्दै वर्तमान परिस्थितिमा लोकतन्त्रको रक्षाका लागि राजनीतिक दलहरूबीच सहकार्य आवश्यक रहेको धारणा राखे।
निरंकुशताको अन्त्य र गणतन्त्र स्थापनाका लागि विगतमा विभिन्न राजनीतिक शक्तिहरू एक ठाउँमा उभिएको स्मरण गर्दै उनले अहिले पनि लोकतान्त्रिक प्रणालीको संरक्षणका लागि दलहरूबीच सहकार्यको आवश्यकता रहेको बताए।
‘पहिले निरंकुशताको अन्त्यका लागि कांग्रेसले वामपन्थीसँग सहकार्य गरेको थियो। लोकतन्त्रको रक्षाका लागि अब सहकार्य गर्छ वा गर्दैन भन्ने प्रश्न आएको छ,’ पोखरेलले भने।
उनले जननिर्वाचित सरकार संसद्प्रति उत्तरदायी र नागरिकप्रति जवाफदेही हुनुपर्नेमा जोड दिए। वर्तमान सरकारको कार्यशैलीबारे आलोचना गर्दै पोखरेलले संसद् र नागरिकप्रतिको जवाफदेहिताको प्रश्न लोकतन्त्रसँग जोडिएको टिप्पणी गरे।
गणतन्त्र स्थापनाका लागि भएका आन्दोलनका क्रममा आफू र थापा सँगै उभिएको प्रसंगसमेत पोखरेलले स्मरण गरे। त्रिचन्द्र क्याम्पसको सभादेखि आन्दोलनमा सँगै रहेको उल्लेख गर्दै उनले थापा अहिले पुरानो लोकतान्त्रिक पार्टी कांग्रेसको नेतृत्वमा पुग्नुलाई सकारात्मक रूपमा लिएको बताए।
कांग्रेसको १५औँ महाधिवेशन आइतबार सभापति थापाले खुलामञ्चमा उद्घाटन गरेका हुन्। उद्घाटन समारोहमा एमाले महासचिव पोखरेलसहित विभिन्न राजनीतिक दलका शीर्ष नेताहरू सहभागी भएका थिए।
