बुटवल:- रुपन्देहीको तिलोत्तमा नगरपालिका वडा नम्बर ४, सुनौलोपथमा एक सुत्केरी महिलाको रहस्यमय मृत्यु भएको छ। मृतक ४० वर्षीया मन्जु नेपाली रहेको प्रहरीले जनाएको छ।
स्थानीयका अनुसार मन्जु नेपाली र उनका श्रीमान् कमल नेपाली विगत केही वर्षदेखि सो क्षेत्रमा भाडामा बस्दै आएका थिए र मजदुरी गरेर जीविकोपार्जन गर्दै आएका थिए। शनिबार राति दुवैले मदिरा सेवन गरेको र सामान्य विवादसमेत भएको जानकारी आएको छ।
इलाका प्रहरी कार्यालय बुटवल का प्रहरी नायब उपरीक्षक निशान्त श्रीवास्तव का अनुसार आइतबार बिहान उनीहरू बस्ने कोठामा मन्जुको शव फेला परेको हो। मृतकसँगै दुई महिनाकी शिशु पनि कोठामै रहेको जनाइएको छ।
प्रहरीका अनुसार मृत्युको कारण हालसम्म खुल्न नसकेको र पोस्टमार्टम रिपोर्टपछि मात्रै स्पष्ट हुने बताइएको छ। घटनाबारे श्रीमान् तथा आफन्तसँग सोधपुछ भइरहेको प्रहरीले जनाएको छ।
मृतक मन्जु धादिङकी निवासी रहेको र प्रेम विवाहपछि दम्पती बुटवलमा बस्दै आएको प्रारम्भिक जानकारी प्राप्त भएको छ। प्रहरीले घटनालाई गम्भीरतापूर्वक लिएर अनुसन्धान अघि बढाएको जनाएको छ।
