बुटवल :-बुटवलमा ट्राफिक नियम उल्लंघन गर्ने ई–रिक्सा चालकहरूमाथि प्रहरीले कडाइ गरेको छ। शुक्रबार मात्रै एकै दिन ४८ जना ई–रिक्सा चालक कारबाहीमा परेका छन्।
सवारी दुर्घटना न्यूनीकरण र सामाजिक अपराध नियन्त्रण गर्ने उद्देश्यले इलाका प्रहरी कार्यालय बुटवल ले विभिन्न स्थानमा चेकजाँच तथा सचेतनामूलक अभियान सञ्चालन गरेको थियो। सो क्रममा नियम उल्लंघन गर्ने चालकहरूलाई कारबाही गरिएको हो।
भुड्किचोक, अमरपथ, कालिका पथको तीनकुने र देवीनगरजस्ता व्यस्त क्षेत्रमा गरिएको अनुगमनका क्रममा बिलबुक नभएका तथा सवारी चालक अनुमति पत्र (लाइसेन्स) बिना सवारी चलाउने चालकहरूलाई नियन्त्रणमा लिइएको प्रहरीले जनाएको छ।
कार्यालय प्रमुख प्रहरी नायव उपरीक्षक निशान्त श्रीवास्तव का अनुसार बुटवललाई सुरक्षित र व्यवस्थित बनाउन यस्ता अभियानहरू निरन्तर सञ्चालन भइरहेका छन्। उनले कारबाहीमा परेका चालकहरूलाई प्रचलित कानुनअनुसार जरिवाना गरिने जानकारी दिए।
यसअघि पनि प्रहरीले स्वरूप परिवर्तन गरी चर्को आवाज निकाल्ने मोटरसाइकलहरू नियन्त्रणमा लिएको थियो। त्यस्तै, ग्राहक ठगी गर्ने उद्देश्यले स्वरूप परिवर्तन गरिएका टिप्पर तथा ट्र्याक्टरहरूलाई समेत कारबाही गरिएको थियो।
“अपरेशन साइलेन्ट स्ट्रिट” अभियानअन्तर्गत ५० भन्दा बढी मोटरसाइकल नियन्त्रणमा लिइएको प्रहरीले जनाएको छ।
