बुटवल :- लुम्बिनी फोटोग्राफर सङ्घको आयोजनामा रुपन्देहीको बुटवलमा नेपालमै पहिलो पटक सिनेमाटोग्राफी तथा भिडियो एडिटिङसम्बन्धी विशेष तालिम आयोजना हुने भएको छ।
यही पुस २५, २६ र २७ गते बुटवलको सिद्धार्थ कटेजमा तीन दिने तालिम सञ्चालन हुने लुम्बिनी फोटोग्राफर सङ्घका अध्यक्ष दिनेश अर्यालले जानकारी दिनुभयो। संघले यसअघि एआई (कृत्रिम बुद्धिमत्ता) सम्बन्धी तालिम सञ्चालन गरिसकेको र फोटोग्राफी तथा भिडियोग्राफीको गुणस्तर थप उकास्ने उद्देश्यले यो नयाँ कार्यक्रम ल्याइएको बताइएको छ।
लुम्बिनी फोटोग्राफर सङ्घका कार्यसमिति सदस्य तथा कार्यक्रम संयोजक दीपक भट्टराईका अनुसार, फोटोग्राफी पेशामा संलग्न व्यक्तिहरूको हित र सीप अभिवृद्धिका लागि नेपालमै पहिलो पटक अन्तर्राष्ट्रिय स्तरको सिनेमाटोग्राफी तथा भिडियो एडिटिङ तालिम आयोजना गर्न लागिएको हो।
तीन दिने तालिममा भारतको चर्चित संस्था ग्रे इन्डियाका प्रमुख साजन मदानले प्रशिक्षण दिनेछन्। नेपालमा यस किसिमको तालिम अहिलेसम्म नहुनुका साथै यो पहिलो अन्तर्राष्ट्रियस्तरको कार्यक्रम भएकाले सहभागी भएर भरपुर फाइदा लिन लुम्बिनी फोटोग्राफर सङ्घका महासचिव त्रिभुवन पाण्डेले आग्रह गर्नुभएको छ।
तालिममा सिनेमाटोग्राफी के हो ?, भिडियो एडिटिङ के हो ?, गिम्बल सेटिङ तथा सञ्चालन, ब्रेकडाउन, प्रि–वेडिङ तथा वेडिङ सिनेमाटिक सुटिङका तरिका, भिडियो एडिटिङ अभ्यास तथा प्रश्नोत्तर सत्र समावेश गरिनेछ।
कार्यक्रममा सहभागी संख्या सीमित रहने भएकाले इच्छुक व्यक्तिहरूलाई समयमै आवेदन दिन आयोजकले अनुरोध गरेको छ। फोटोग्राफी तथा भिडियो निर्माण क्षेत्रमा क्रियाशील युवाहरूका लागि यो तालिम ज्ञान, सीप र अनुभव आदान–प्रदान गर्ने महत्वपूर्ण अवसर हुने अपेक्षा आयोजकको छ।
