रूपन्देही:- गुल्मी जौसिथोक सम्पर्क समाजको आयोजनामा २०८३ सालको क्यालेन्डर विमोचन कार्यक्रम साढे–कटेमामा भव्य रूपमा सम्पन्न भएको छ। रुपन्देहीमा विभिन्न पेशा तथा व्यवसायमा आबद्ध जौसिथोकवासीहरूको सामूहिक पहलमा आयोजना गरिएको उक्त कार्यक्रमले आपसी एकता र सहकार्यको सन्देश दिएको छ।
जौसिथोकबाट बाहिरिएर रुपन्देहीमा बसोबास तथा रोजगारी गर्दै आएका व्यक्तिहरूबीच सम्बन्ध सुदृढ गर्ने, अनुभव आदान–प्रदान गर्ने तथा समाजप्रतिको जिम्मेवारीलाई अझ मजबुत बनाउने उद्देश्यले कार्यक्रम आयोजना गरिएको समाजले जनाएको छ।
कार्यक्रम समाजका अध्यक्ष राजेन्द्र कुरको अध्यक्षतामा सम्पन्न भएको थियो। कार्यक्रममा विभिन्न क्षेत्रका व्यक्तित्वहरूको उल्लेखनीय सहभागिता रहेको थियो। सहभागीहरूले समाजको समृद्धि, एकता तथा भावी योजनाका विषयमा खुला छलफल गरेका थिए।
क्यालेन्डर विमोचनसँगै आयोजित सामूहिक भेटघाटले परदेशमा रहे पनि आफ्नो जन्मथलोप्रतिको माया, सम्बन्ध र सहकार्यलाई अझ प्रगाढ बनाउने विश्वास व्यक्त गरिएको छ। सहभागीहरूले यस्ता कार्यक्रमले समाजलाई एकजुट बनाउने मात्र नभई भावी पुस्तालाई समेत सकारात्मक सन्देश दिने धारणा राखेका थिए।
समाजले आगामी दिनहरूमा पनि यस्ता कार्यक्रमलाई निरन्तरता दिँदै सामाजिक, सांस्कृतिक तथा विकासका क्षेत्रमा सक्रिय भूमिका निर्वाह गर्ने प्रतिबद्धता जनाएको छ।
