बुटवल :-फागुन २१ मा हुने प्रतिनिधि सभा सदस्य निर्वाचन आउन अब ८ दिन मात्र बाँकी रहँदा चुनावी माहोल झन् तातिएको छ। रुपन्देही–२ बाट प्रतिनिधि सभा सदस्यका लागि नेपाली कांग्रेसका उम्मेदवार चुन्न प्रसाद शर्मा पौडेल र समानुपातिक उम्मेदवार रिता सेन ओलीले बुधबार नवौं दिनको घरदैलो अभियानलाई निरन्तरता दिएका छन्।
उम्मेदवार पौडेलले विकास र सुशासनसँगै मतदाताका स्थानीय समस्याहरू समाधान गर्ने प्रतिबद्धता व्यक्त गरेका छन्। बिहान ७ बजेबाट सुरु भएको घरदैलो अभियान बुटवल उपमहानगरपालिका–१० को रामनगर क्षेत्रबाट प्रारम्भ भएको थियो। रामनगर हुँदै टोली राजमार्ग चौराहा आसपासका टोलमा पुगेर घरघरमा भेटघाट गरेको थियो। उम्मेदवारहरूले मतदातासँग आशीर्वाद लिँदै सुझाव संकलन गरेका थिए।
अभियान योगिकुटी क्षेत्र हुँदै सर्विस लेनमार्फत पुनः चौराहामा पुगेर सम्पन्न भएको थियो। घरदैलोका क्रममा स्थानीयले ढल निकासको समस्या, टोल सुधार कार्यक्रम, सडक स्तरोन्नति र सरसफाइ व्यवस्थापनका विषयमा गुनासा राखेका थिए। उम्मेदवार पौडेलले ती समस्या समाधानलाई प्राथमिकतामा राख्ने प्रतिबद्धता जनाउँदै अधुरा विकास योजनालाई पूर्णता दिने बताएका थिए।
दिउँसो १ बजेबाट बुटवल उपमहानगरपालिका–८ मा पनि घरदैलो कार्यक्रम सञ्चालन गरिएको थियो। शुक्रपथ, कुशुमपथ, धर्मपथ, त्रिभुवनपथ, दशरथपथ, श्रवणपथ र भाटभटेनी लाइन आसपासका क्षेत्रमा पुगेर उम्मेदवारहरूले मतदातासँग संवाद गरेका थिए। स्थानीय बासिन्दाले खानेपानी, ढल निकास, सडक व्यवस्थापन तथा ट्राफिक समस्याका विषयमा ध्यानाकर्षण गराएका थिए। वर्षायाममा ढल अभावले समस्या हुने गरेको गुनासोसमेत आएको थियो।
घरदैलोका क्रममा स्थानीयले उम्मेदवारलाई फूलमाला, टीका तथा खादा लगाएर स्वागत गरेका थिए। अभियानमा पार्टीका स्थानीय नेता, कार्यकर्ता र शुभेच्छुकहरूको उल्लेख्य उपस्थिति देखिएको थियो।
निर्वाचन नजिकिँदै जाँदा उम्मेदवारहरूले प्रत्यक्ष भेटघाटलाई प्राथमिकता दिँदै अभियानलाई अझ तीव्र बनाएका छन्।
कांग्रेस उम्मेदवार पौडेलले विकास, सुशासन र स्थानीय समस्या समाधानलाई मुख्य एजेण्डा बनाएको बताएका छन्। बाँकी दिनहरूमा पनि विभिन्न वडामा घरदैलो तथा भेटघाट कार्यक्रमलाई निरन्तरता दिइने प्रचारप्रसार संयोजक तथा क्षेत्रीय सभापति प्रजापाल गिरीले जानकारी दिएका छन्।
