काठमाडौं :- सुधन गुरुङ ले प्रतिनिधिसभाको आजको बैठकमा तीन वटा अध्यादेश पेश गरेका छन्।सभाको पहिलो अधिवेशनको पहिलो बैठकमा दलीय आधारमा सदस्यहरूले मन्तव्य राखिसकेपछि नियमित कार्यसूचीअन्तर्गत उनले ‘नागरिकतासम्बन्धी (पहिलो संशोधन) अध्यादेश २०८२’, ‘प्रतिनिधिसभा सदस्य निर्वाचन (पहिलो संशोधन) अध्यादेश २०८२’ र ‘नेपाल विशेष सेवा (तेस्रो संशोधन) अध्यादेश २०८२’ पेश गरेका हुन्।
सरकारले संविधानको धारा ८४ को उपधारा (२) अनुसार समानुपातिक बन्दसूचीमा समावेश गराउनुपर्ने जनसङ्ख्याको आरक्षण सुनिश्चित गर्न नागरिकतासम्बन्धी कानून अध्यादेशमार्फत संशोधन गरेको जनाएको छ।
यसैगरी, प्रतिनिधिसभा सदस्य निर्वाचनसम्बन्धी अध्यादेश मतदाता नामावली अद्यावधिक गर्ने उद्देश्यले अघिल्लो सरकारले ल्याएको थियो।
त्यसैगरी, ‘नेपाल विशेष सेवा (तेस्रो संशोधन) अध्यादेश’मार्फत राष्ट्रिय अनुसन्धान विभागलाई प्रधानमन्त्री तथा मन्त्रिपरिषद् कार्यालयअन्तर्गतबाट गृह मन्त्रालयअन्तर्गत ल्याउने व्यवस्था गरिएको गृहमन्त्री गुरुङले जानकारी दिए।
बैठकमा विभिन्न समयावधिमा निधन भएका संविधानसभा सदस्य तथा पूर्वसदस्यहरू—ऋषिकेश गौतम, मोहम्मद अफ्ताब आलम, कृष्णकुमारी श्रेष्ठ, आमोदप्रसाद उपाध्याय, होमनाथ दाहाल तथा संविधानसभा र राष्ट्रियसभाका सदस्य बलदेव बोहरा को निधनप्रति शोक प्रस्ताव पारित गरिएको छ।प्रतिनिधिसभाको अर्को बैठक चैत २२ गते आइतबार बिहान ११ बजे बस्नेछ।
