बुढानिलकण्ठ, काठमाडौं:-बुढानिलकण्ठ–१३ का कार्यवहाक वडाअध्यक्ष मंगल नरकोटीसँग गरिएको विस्तृत कुराकानीले स्थानीय सरकारको दृष्टिकोण, जिम्मेवारी र भविष्यको दिशा स्पष्ट पार्दछ। कार्यवहाक अध्यक्ष नरकोटीले विकास, नीति तथा योजना कार्यान्वयनका विषयमा आफ्नो दृढ धारणा व्यक्त गर्दै भने — “हामी योजना बनाउँछौं मात्र होइन, त्यसलाई व्यवहारमा उतार्ने हिम्मत पनि राख्छौं। जनताको विश्वास नै हाम्रो शक्ति हो, त्यसैले पारदर्शिता र जनसहभागिता हाम्रो पहिलो प्राथमिकता हो।”
वडाभित्रका सडक, ढल, खानेपानी, शिक्षा र स्वास्थ्यजस्ता आधारभूत आवश्यकता सम्बोधनका लागि योजना निर्माण र कार्यान्वयन निरन्तर भइरहेको बताउँदै उहाँले थपे — “विकास भनेको केवल भवन र बाटो होइन, नागरिकलाई सहज र सुरक्षित जीवन दिनु हो।”
तर समस्या र चुनौती पनि छन्। सीमित बजेट, प्राविधिक कठिनाइ र जनसहभागिताको कमीले कतिपय काममा ढिलाइ भएको कार्यवहाक अध्यक्ष नरकोटीको भनाइ छ। उहाँले भने — “हामी आलोचना सुन्छौं, सुधार गर्छौं, र अगाडि बढ्छौं। गल्ती सुधार्दै अघि बढ्नु नै हाम्रो बाटो हो।”
बुढानिलकण्ठ–१३ ले विगतका वर्षहरूमा जनताको विश्वास जित्दै, स्थानीय स्तरमा उत्तरदायी र पारदर्शी प्रशासनको उदाहरण प्रस्तुत गर्दै आएको छ। वडास्तरका योजना र परियोजनामा नागरिकको सहभागिता र अनुगमनलाई प्राथमिकतामा राखिएको छ।
कार्यवहाक अध्यक्ष नरकोटीको अडिग बोलीले स्पष्ट सन्देश दिन्छ — “हामी कुरा होइन, कामकाे प्रमाण देखाउँछौं। दृढ इच्छाशक्ति, एकता र पारदर्शिताले मात्रै वडालाई समृद्ध र जिम्मेवार बनाउन सक्छ।”
स्थानीय सरकारको सशक्तिकरण र उत्तरदायित्व अभिवृद्धिका लागि यस्ता नेतृत्व र दृष्टिकोण देशभरका वडाहरूका लागि प्रेरणादायी बन्न सक्छन्।
