काठमाडौं :- केपी शर्मा ओली पक्राउ परेका छन्। उनलाई काठमाडौँ उपत्यका अपराध अनुसन्धान कार्यालय र केन्द्रीय अनुसन्धान ब्यूरोको संयुक्त टोलीले भक्तपुरस्थित गुण्डु निवासबाट पक्राउ गरेको हो।
प्रहरी उच्च स्रोतका अनुसार मन्त्रिपरिषद्को निर्णयका आधारमा अत्यन्त जरुरी पुर्जी जारी गरी ओलीलाई नियन्त्रणमा लिइएको हो। पक्राउसँगै गुण्डु क्षेत्रमा ठूलो संख्यामा प्रहरी परिचालन गरिएको छ भने केही संख्यामा एमाले कार्यकर्ताको उपस्थिति पनि देखिएको छ।
भदौ २३ र २४ गते भएको ‘जेनजी आन्दोलन’को समयमा ओली प्रधानमन्त्री थिए। उनले आफूले गोली चलाउने आदेश नदिएको दाबी गर्दै आएका थिए। घटनापछि भदौ २४ गते उनले प्रधानमन्त्री पदबाट राजीनामा दिएका थिए।
यसअघि सोही घटनासम्बन्धी मुद्दामा पूर्वगृहमन्त्री रमेश लेखक पनि शनिबार बिहान पक्राउ परिसकेका छन्।
उक्त घटनाको छानबिनका लागि गठित गौरीबहादुर कार्की नेतृत्वको आयोगले ओली, लेखकसहित केन्द्रीय सुरक्षा समितिका पदाधिकारीमाथि फौजदारी मुद्दामा अनुसन्धान गर्न सिफारिस गरेको थियो।
बालेन्द्र शाह नेतृत्वको मन्त्रिपरिषद्को पहिलो बैठकले उक्त प्रतिवेदन कार्यान्वयन गर्ने निर्णय गरेपछि गृहमन्त्री सुधन गुरुङ ले प्रहरी महानिरीक्षक दानबहादुर कार्की तथा सशस्त्र प्रहरी महानिरीक्षक राजु अर्याल सँग सिफारिस कार्यान्वयनबारे छलफल गरेका थिए।
उच्च तहका नेताहरूको पक्राउसँगै देशको राजनीतिक अवस्था थप संवेदनशील बन्ने संकेत देखिएको छ।
