काठमाडौँ । राष्ट्रिय स्वतन्त्र पार्टी (रास्वपा)का सभापति रवि लामिछानेले प्रधानमन्त्री सुशीला कार्कीलाई निर्धक्क भएर काम–कारबाही अघि बढाउन आग्रह गरेका छन्। शनिबार चितवनमा आयोजित पार्टी कार्यकर्ता भेलालाई सम्बोधन गर्दै उनले सुशासन र निष्पक्ष कामका लागि रास्वपा सरकारको साथमा रहेको स्पष्ट पारे।
आफू नक्खु कारागारमा रहेका बेला टेलिभिजनमा प्रधानमन्त्रीको अनुहार कहिलेकाहीँ उदास देखिने गरेको उल्लेख गर्दै लामिछानेले प्रधानमन्त्रीलाई उत्साहित बन्न आग्रह गरे। “आफ्नो अनुहार उज्यालो पार्नुस् प्रधानमन्त्रीज्यू,” उनले भने, “रास्वपा तपाईंको साथमा छ। सुशासनको डन्डा चलाउनुस्, निर्धक्क भएर निर्णय गर्नुस्, चुनाव गराउनुस्। रास्वपा तपाईंको साथमा छ।”
पूर्वगृहमन्त्रीसमेत रहेका लामिछानेले प्रधानमन्त्री कार्की न्यायालयको प्रतीकजस्तै व्यक्तित्व भएको उल्लेख गर्दै अब देशलाई पनि न्याय दिलाउने जिम्मेवारी उहाँकै काँधमा रहेको बताए। “प्रधानमन्त्रीको साथमा केवल रास्वपा मात्र होइन, सिंगो देश उभिएको छ,” उनले भने।
सुप्रिम सहकारी ठगी प्रकरणमा रुपन्देही जिल्ला अदालतमा पौने चार करोड रुपैयाँ धरौटी बुझाएर शुक्रबार रिहा भएका लामिछानेको यो पहिलो सार्वजनिक राजनीतिक सम्बोधन हो। रिहाइपछि उनले पार्टी कार्यकर्तामाझ देखाएको आक्रामक र उत्साहपूर्ण अभिव्यक्तिले रास्वपाको आगामी राजनीतिक यात्रामा थप सक्रियता देखिने संकेत गरेको छ।
