काठमाडौं :- गृह मन्त्रालय ले सुरक्षाकर्मीलाई हाइअलर्टमा बस्न निर्देशन दिएको छ। मन्त्रिपरिषद्ले ‘जेनजी आन्दोलन जाँचबुझ आयोग’को प्रतिवेदन कार्यान्वयन गर्ने निर्णय गरेसँगै यस्तो निर्देशन जारी गरिएको हो।
गृह मन्त्रालयको निर्देशनअनुसार नेपाल प्रहरी प्रधान कार्यालयले उपत्यका प्रहरी कार्यालय रानीपोखरीसहित सम्बन्धित निकायलाई सतर्क अवस्थामा रहन परिपत्र गरेको प्रहरी स्रोतले जनाएको छ।
बालेन्द्र शाह नेतृत्वको मन्त्रिपरिषद्को पहिलो बैठकले आयोगका सिफारिसहरू कार्यान्वयन गर्ने निर्णय गरेको थियो। सो निर्णयअनुसार राजनीतिक व्यक्तिहरूलाई कारबाहीको दायरामा ल्याइने र सुरक्षाकर्मीको हकमा भने छुट्टै समिति गठन गरेर थप अनुसन्धान गरिनेछ।
गृहमन्त्री सुधन गुरुङ ले पदभार ग्रहणपछि आयोगको प्रतिवेदन कार्यान्वयनमा लैजाने प्रतिबद्धता जनाउँदै आएका छन्। “जेनजी जनादेशअनुसार सरकार अघि बढ्छ, आयोगले सिफारिस गरेका सबैलाई कारबाही हुन्छ,” उनले बताएका छन्।
सुरक्षा स्रोतका अनुसार सम्भावित राजनीतिक विरोध प्रदर्शनलाई ध्यानमा राख्दै प्रहरीलाई तयारी अवस्थामा रहन निर्देशन दिइएको छ। शनिबार बिहान ७ बजेसम्म प्रहरी प्रधान कार्यालयमा कार्यरत अधिकारीहरूलाई फिल्ड ड्रेसमा अनिवार्य उपस्थित हुनसमेत भनिएको छ।
सरकारको निर्णयपछि देशको सुरक्षा अवस्था संवेदनशील बन्न सक्ने आँकलन गर्दै सुरक्षा संयन्त्रलाई उच्च सतर्कतामा राखिएको छ।
