झापा :-झापा–५ मा प्रतिनिधिसभा निर्वाचनअन्तर्गत मतदान सम्पन्न भएसँगै अब सबैको ध्यान मतगणनातर्फ केन्द्रित भएको छ। देशभरका निर्वाचन क्षेत्रमध्ये निकै चासोका साथ हेरिएको यस क्षेत्रमा मुख्यतः नेकपा (एमाले) का अध्यक्ष केपी शर्मा ओली र राष्ट्रिय स्वतन्त्र पार्टी (रास्वपा) का वरिष्ठ नेता बालेन्द्र शाह (बालेन) बीच प्रतिस्पर्धा हुने अनुमान गरिएको छ।
मतदान शान्तिपूर्ण रूपमा सम्पन्न भएको जनाइएको छ। मतदान सकिएसँगै विभिन्न मतदान केन्द्रबाट मतपेटिका संकलन गर्ने काम तीव्र रूपमा अघि बढाइएको छ। दमक नगरपालिका–८ स्थित निर्वाचन अधिकृतको कार्यालयमा मतपेटिका ल्याउने र जम्मा गर्ने कार्य जारी रहेको छ।
झापा–५ भौगोलिक रूपमा सुगम क्षेत्र भएकाले धेरैजसो मतदान केन्द्रबाट मतपेटिका संकलन भइसकेका छन् भने केही स्थानबाट आउने क्रम जारी रहेको छ। मतपेटिका संकलन पूरा भएपछि सर्वदलीय बैठकको निर्णयअनुसार मतगणना सुरु गरिने तयारी गरिएको निर्वाचन अधिकृतको कार्यालयले जनाएको छ।
यस क्षेत्रको निर्वाचन परिणामले राष्ट्रिय राजनीतिको समीकरणमा समेत प्रभाव पार्ने भएकाले झापा–५ को मतगणनालाई देशभर चासोका साथ हेरिएको छ।
