बुटवल :-फागुन २१ गते हुने प्रतिनिधिसभा निर्वाचन नजिकिँदै जाँदा पश्चिम नेपालको प्रमुख व्यापारिक केन्द्र बुटवल बजार सुनसान बन्दै गएको छ। सोमबारसम्म भीडभाड देखिएको बजार मंगलबारसम्म आइपुग्दा खालीजस्तै देखिएको हो।
लुम्बिनी प्रदेशको प्रमुख केन्द्रका रूपमा परिचित बुटवलमा बसोबास गर्ने विभिन्न राजनीतिक दलका नेता–कार्यकर्ता तथा विद्यार्थी मतदानका लागि आ–आफ्नो गाउँ फर्किएपछि बजारको चहलपहल घटेको हो। पाल्पा, गुल्मी, अर्घाखाँची, प्युठान, स्याङ्जा, बाग्लुङ र पर्वतलगायत पहाडी जिल्लाबाट व्यापार–व्यवसाय र रोजगारीका लागि ठूलो संख्यामा मानिस यहाँ बस्दै आएका छन्। चाडपर्व र निर्वाचनका बेला उनीहरू जन्मघर फर्किने प्रचलनअनुसार यसपटक पनि मतदाता गाउँतर्फ लागेका छन्।
तराई क्षेत्रमा मंगलबार परेको होलीको सार्वजनिक बिदाले पनि यात्रुहरूको चाप बिहानैदेखि बढाएको छ। निर्वाचनको माहोलका कारण यस वर्ष होलीको चहलपहल भने विगतको तुलनामा कम देखिएको छ।
पश्चिम नेपाल बस व्यवसायी प्रालिका सञ्चालक जीवनकुमार बञ्जाडेले बुटवल–भैरहवा क्षेत्रमा बसोबास गर्ने मतदाताहरू आफ्नो क्षेत्रमा मत हाल्न विद्युतीय साना गाडी रिजर्भ गरेर गाउँतर्फ गइरहेको जानकारी दिए। आवश्यकताअनुसार जुनसुकै बेला ठूला गाडी सञ्चालन गर्न कम्पनी २४सै घण्टा तयारी अवस्थामा रहेको उनले बताए।
अधिकांश होटल तथा पसल बन्द देखिएका छन् भने बजार, चोक र चिया पसलमा हुने चुनावी बहस तथा छलफलसमेत कम हुँदै गएको छ।
यसैबीच जिल्ला प्रहरी कार्यालय रुपन्देहीका प्रवक्ता डीएसपी कृष्णकुमार चन्दले गत रातिदेखि नेपाल–भारत सीमा नाका ७२ घण्टाका लागि पूर्ण रूपमा बन्द गरिएको जानकारी दिए।
निर्वाचनलाई लक्षित गर्दै सुरक्षा व्यवस्था कडा बनाइएको उनले बताए।
‘हामीसँग अहिले अतिरिक्त जनशक्ति र सवारी साधन थपिएका छन्,’ चन्दले भने, ‘मतदानका लागि पहाडतर्फ जाने नागरिकलाई पनि ठाउँ–ठाउँबाट प्रहरीले सहजीकरण गरिरहेको छ।’
