काठमाण्डौं:- कुलमान घिसिङ संरक्षक रहेको उज्यालो नेपाल पार्टीले राष्ट्रिय स्वतन्त्र पार्टी (रास्वपा) र काठमाडौँका मेयर बालेन शाहसँग विलय वा एकतामा नजाने निर्णय गरेको छ।
शनिबार कुलमान घिसिङको उपस्थितिमा बसेको केन्द्रीय समिति बैठकले आफ्नो पार्टीको अस्तित्व कायम राख्दै अरू पार्टीसँग विलय नगर्ने नीति तय गरेको हो।
बैठकमा सहभागी एक नेताका अनुसार, “हामी हदसम्म लचक हुन खोज्यौँ, तर उनीहरू मिल्न इच्छुक भएनन्। अब उज्यालो नेपाल पार्टीकै नेतृत्वमा चुनावमा जाने निर्णय गरेका छौँ।”
बैठकले वैकल्पिक र अग्रणी शक्ति मिलाएर साझा ढाँचामा जान सबै पार्टीलाई आह्वान गर्ने निर्णय पनि सुनाएको छ। नेताहरूले भने, “हाम्रै पहलमा यदि रास्वपा लगायत सबै पक्ष मिलेर अघि बढ्न चाहन्छन् भने उज्यालो नेपाल पार्टी आह्वान गर्दछ।”
अर्का नेताका अनुसार, पार्टीमा आउने इच्छुक उम्मेदवारका लागि सभापति र प्रधानमन्त्री पद समेत त्याग गर्न तयार रहेको स्पष्ट गरिएको छ। “उज्यालो नेपाल पार्टीमै आएर चुनाव लड्न चाहनेलाई हामी सभापति र प्रधानमन्त्री समेत दिन तयार छौँ,” उनले भने।
उज्यालो नेपाल पार्टीले यस निर्णयमार्फत आफ्नो स्वतन्त्र राजनीतिक पहिचान कायम राख्दै आगामी चुनावमा आफ्नो नेतृत्वमा प्रतिस्पर्धा गर्ने रणनीति स्पष्ट गरेको छ।
