काठमाडौँ :- नेपाली राजदूतावास, दोहा ले मध्यपूर्वमा विकसित विशेष परिस्थितिलाई दृष्टिगत गर्दै कतारमा रहेका नेपाली नागरिकलाई उच्च सतर्कता अपनाउन विशेष अनुरोध गरेको छ ।
दूतावासले कतारको सिभिल एभियासन अथोरिटी लगायत कतारका आधिकारिक निकायबाट जारी हुने सूचना, निर्देशन तथा अद्यावधिक समाचारमा ध्यान दिन आग्रह गरेको छ । कतारी हवाई क्षेत्र खुलेपश्चात् मात्र नियमित उडान सञ्चालन हुने जनाउँदै सम्बन्धित जानकारी आधिकारिक वेबसाइटमार्फत हेर्न अनुरोध गरिएको छ ।
दूतावासले अफवाहपूर्ण सूचना तथा घटनास्थलका तस्बिर–भिडियो सामाजिक सञ्जालमा साझा नगर्न आग्रह गरेको छ । अत्यावश्यक कामबाहेक भीडभाड हुने स्थानमा नजान, अपरिचित शव वा शंकास्पद वस्तुको नजिक नपुग्न र सुरक्षित रूपमा घरभित्रै बस्न अनुरोध गरिएको छ ।
साथै सिसा, झ्याल वा बार्दली नजिक नबस्न, मोबाइल फोन पूर्ण चार्ज अवस्थामा राख्न, केही नगद र महत्वपूर्ण परिचयपत्र साथमा राख्न पनि सुझाव दिइएको छ । नेपालमा रहेका परिवारजन तथा कतारस्थित नेपाली समुदायसँग नियमित सम्पर्कमा रहन दूतावासले आग्रह गरेको छ ।
दोहा ट्रान्जिट हुँदै अन्य मुलुकतर्फ यात्रा गर्ने क्रममा कतारमा रोकिएका नेपाली नागरिकलाई मेडिकल आपत्कालीन अवस्था परेमा तत्काल दूतावाससँग सम्पर्क गर्न अनुरोध गरिएको छ ।
यस परिस्थितिको फाइदा उठाउँदै केही ठगहरूले फोनमार्फत दुःख दिएको गुनासो आएको उल्लेख गर्दै दूतावासले कतारी आइडी, राहदानी, बैंक खाता, एटीएम कार्डलगायतका व्यक्तिगत विवरण कसैलाई नदिन सचेत गराएको छ ।
दूतावासले सार्वजनिक गरेका महत्वपूर्ण सम्पर्क नम्बरहरू यसप्रकार छन्:
नेपाली राजदूतावास, दोहा: +९७४ ४४६७५६८९, +९७४ ६६२१ ४४१९
प्रहरी / आगजनी / एम्बुलेन्स: ९९९
हमाद जेनरल हस्पिटल: +९७४ ४४३९ ४४४४
नेपाल एयरलाइन्स: +९७४ ६६५६ ०८३३
हिमालय एयरलाइन्स: +९७४ ५०७२१७४९
कतार एयरवेज इमर्जेन्सी रेस्पोन्स टिम: +९७४ ४९४४५५५५
दूतावासले शान्त, संयमित र सचेत रहन सबै नेपाली नागरिकलाई पुनः आग्रह गरेको छ ।
