बुटवल :-– राष्ट्रिय जनमुक्ति पार्टीका केन्द्रीय अध्यक्ष तथा केशव बहादुर थापा सुर्यवंशी ले देशलाई बेरोजगारीको कारखाना बनाउनेहरूका हिसाबकिताब गर्ने समय आएको बताएका छन्।
आइतबार बुटवलको ट्राफिक चोकमा आयोजित चुनावी नागरिक सम्बोधन सभामा अध्यक्ष सुर्यवंशीले देशका उद्योग–कलकारखाना बन्द गरी युवाहरूलाई खाडी मुलुकमा श्रम गर्न पठाउने सरकार र दलका नेताहरूको जिम्मेवारी लिनुपर्ने बताए। बुटवलको धागो कारखाना, बिराटनगर जुटमिल, हेटौंडाको कागज कारखाना लगायत उद्योग बन्द हुँदा लाखौं युवा बेरोजगार बनेको र पुनः चुनावमा उनीहरूले भोट माग्न आउँदा जनताले हिसाबकिताब माग्नुपर्ने उनले औँल्याए।
अध्यक्ष सुर्यवंशीले प्राकृतिक स्रोत र सांस्कृतिक विविधता पर्याप्त भए पनि राज्य सञ्चालन गर्ने सोचका कारण देश पछाडि परेको बताए। दक्षिण–पूर्वका द्वन्द्वका कारण १५ लाख बढी नेपालीहरूको भविष्य संकटमा परेको भन्दै उनले सरकारबाट तत्काल उद्धार गर्न माग गरे।
उनले आफ्नो चुनाव जिते ३५० दिन भित्र भैरहवा स्थित गौतमबुद्ध अन्तर्राष्ट्रिय विमानस्थल बाट दैनिक कम्तीमा तीनवटा अन्तर्राष्ट्रिय उडान सञ्चालन गर्ने व्यवस्था मिलाउने वाचा गरे। यदि असफल भए सांसदबाट राजीनामा दिने प्रतिज्ञा समेत व्यक्त गरे।
राष्ट्रिय जनमुक्ति पार्टीका केन्द्रीय सचिव तथा रूपन्देही क्षेत्र नं ३ का उम्मेदवार मोज़िव अली ले पार्टीको संघीयता र समावेशीताको प्राथमिकतामा रहँदै आएको ऐतिहासिक भूमिका औँल्याए। उनले देशको विकासमा अन्य पार्टीको प्रभाव नपुगेको भन्दै नयाँ दलको आवश्यकता रहेको बताए।
कार्यक्रममा पार्टीका प्रेमबहादुर थापा, झम बहादुर गुरूङ, चन्दा थापा, थर्कबहादुर बारघरे मगर र महिला नेतृ राधिका श्री ले मतदान गर्दा केवल सरकारको चुनाव नभई देशको राष्ट्रियता, स्वाधीनता र नागरिक स्वतन्त्रताको रक्षा सुनिश्चित गर्नुपर्नेमा जोड दिए।
