बुटवल :- उज्यालो नेपाल पार्टी का तर्फबाट रूपन्देही निर्वाचन क्षेत्र नं. २ मा उम्मेदवार बनेका सुरज पाण्डे यसपालिको चुनावमा फरक पृष्ठभूमिका कारण चर्चामा छन्। परम्परागत राजनीतिक परिवारभन्दा बाहिरबाट, प्राविधिक र उद्यमशील क्षेत्रबाट राजनीतिमा आएका पाण्डेले आफूलाई “नतिजा दिने राजनीति” का पक्षधरका रूपमा प्रस्तुत गरेका छन्।
रूपन्देही–२ मा वर्षौंदेखि स्थापित नेताहरूबीच प्रतिस्पर्धा हुँदै आएको छ। यसबीच पाण्डेले विकास, ऊर्जा र सुशासनलाई केन्द्रमा राख्दै नयाँ बहस सुरु गर्ने प्रयास गरेका छन्। इन्जिनियरिङ अध्ययन गरेका उनी ऊर्जा तथा पूर्वाधार क्षेत्रमा सक्रिय रहँदै आएका थिए। उद्योग सञ्चालन र रोजगारी सिर्जनासँग जोडिएको अनुभवलाई उनले चुनावी एजेन्डासँग जोड्दै “समस्या थाहा छ, समाधानको नक्सा पनि तयार छ” भन्ने सन्देश दोहोर्याइरहेका छन्।
उनको भनाइमा देशको राजनीति लामो समयसम्म सत्ता समीकरणमै अल्झिएको छ, अब उत्पादन, रोजगारी र प्रविधिमैत्री शासनतर्फ मोडिनुपर्ने समय आएको छ।
पाण्डेले आफ्नो चुनावी प्रतिबद्धतालाई ‘आठ संकल्प’ नाम दिएका छन्। ती संकल्पमा ठूला पूर्वाधार आयोजना, ऊर्जा व्यापार विस्तार, औद्योगिक क्षेत्र विकास, सडक विस्तार तथा क्षेत्रीय कनेक्टिभिटीलाई प्राथमिकता दिइएको छ।
विशेषगरी बुटवललाई औद्योगिक तथा ऊर्जा केन्द्रका रूपमा विकास गर्ने, स्थानीय युवालाई रोजगारी दिन उद्योग–पूर्वाधार समन्वय गर्ने र दीगो आर्थिक आधार निर्माण गर्ने योजना उनले सार्वजनिक गरेका छन्।
“रूपन्देही–२ ले अब भाषण होइन, स्पष्ट योजना र समयसीमा खोजेको छ,” उनको दाबी छ।
पूर्वाधारसँगै सामाजिक सुरक्षालाई पनि उनले जोड दिएका छन्। ‘आमा स्वाभिमान’ अभियानमार्फत गर्भवती र नवजात शिशुका लागि आर्थिक तथा स्वास्थ्य सहायता कार्यक्रम प्रस्ताव गरिएको छ।
महिलामाथि हुने हिंसा तथा अन्यायका मुद्दामा राज्यले निःशुल्क कानुनी सहयोग उपलब्ध गराउनुपर्ने माग पनि उनले उठाएका छन्।
रूपन्देही–२ मा परम्परागत रूपमा ठूला दलहरूको प्रभाव रहँदै आएको छ। नेपाल कम्युनिष्ट पार्टी (एमाले), नेपाली कांग्रेस लगायतका स्थापित दलका प्रभावशाली उम्मेदवारहरू मैदानमा छन्। साथै नयाँ राजनीतिक शक्तिहरूको सक्रियताले प्रतिस्पर्धा थप रोचक बनेको छ।
यस्तो अवस्थामा पाण्डेको चुनौती दोहोरो देखिन्छ—एकातिर स्थापित संरचनासँग प्रतिस्पर्धा, अर्कोतिर आफ्नै पार्टी संगठन विस्तार। उनी भने आफूलाई “सत्ता होइन, संरचना परिवर्तन” को उम्मेदवारका रूपमा प्रस्तुत गरिरहेका छन्।
रूपन्देही–२ मा युवा मतदाता संख्या उल्लेख्य छ। पाण्डेले विशेषगरी शिक्षित युवा, उद्यमी तथा रोजगारी खोजिरहेका वर्गलाई लक्षित गर्दै अभियान चलाएका छन्। प्रविधि, पारदर्शिता र परिणाममुखी शासनको नाराले केही युवामा आकर्षण देखिएको स्थानीय विश्लेषकहरूको भनाइ छ।
तर अन्तिम निर्णय भने मतदाताकै हातमा रहनेछ। सुरज पाण्डेको उम्मेदवारी रूपन्देही–२ मा परम्परागत राजनीति र नयाँ सोचबीचको प्रतिस्पर्धाको प्रतीक बनेको छ। अनुभवका हिसाबले नयाँ भए पनि एजेन्डाका हिसाबले दीर्घकालीन योजना बोकेर मैदानमा उत्रिएका पाण्डेलाई मतदाताले कस्तो निर्णय दिन्छन्, त्यसले क्षेत्रको राजनीतिक दिशाबारे स्पष्ट संकेत दिनेछ।
