बुटवल :-सुवास पाण्डे ‘विश्वदीप’समक्ष तिलोत्तमा नगरपालिकाबासीले छाडा चौपायाको समस्या डरलाग्दो बन्दै गएको भन्दै तत्काल पहल गर्न आग्रह गरेका छन्।
नेपाली कम्युनिष्ट पार्टी (नेकपा)का उम्मेदवार पाण्डेसँग मतदाताले विभिन्न अपेक्षा राख्दै छाडा चौपायाले पार्ने असुविधा, कृषकको बालिनालीमा हानी, व्यवसायमा समस्या, सडक दुर्घटना र फोहर व्यवस्थापनको गम्भीर चुनौतीबारे गुनासो व्यक्त गरेका छन्। मतदाताले वडा नम्बर १ मा रहेको गौशाला अन्यत्र सार्न र नगरभित्र रहेका अन्य छाडा चौपाया पनि उचित व्यवस्थापनका लागि कदम चाल्न माग गरेका छन्।
घरदैलोका क्रममा स्थानीय व्यवसायी टिकाराम भण्डारीले आफूहरूको पीडा कसैले नसुन्ने भन्दै पाण्डेलाई अभिभावकीय भूमिका खेल्न आग्रह गर्नुभयो। पाण्डेले मतदाताका मौखिक तथा लिखित समस्यासँगै १२ बुँदामा साझा मुद्दाहरू संकलन गरी समाधानमा आफू प्रतिवद्ध रहेको बताउनुभयो। उनले सरोकारवाला निकायसँग समन्वय गरेर अल्पकालिन र दीर्घकालिन योजना बनाई समस्या समाधान गरिने बताए।
मतदाताले तिनाउ नदीबाट आउने तपाह खोलाको पानीमा केमिकल, प्लास्टिक र फोहर बगेर कृषक प्रभावित हुने समस्या पनि उठाएका थिए। पाण्डेले यसबारे वैज्ञानिक फोहर व्यवस्थापन गर्ने र स्थानीय कृषकको स्वास्थ्य सुरक्षामा ध्यान दिने प्रतिबद्धता व्यक्त गर्नुभयो।
उम्मेदवार पाण्डेले आफू यहीं जन्मे हुर्केको व्यक्ति भएकाले भोट बटुल्न होइन, क्षेत्रका समस्या समाधान र विकासका लागि उम्मेदवारी दिएको बताए। उनले निर्वाचन सम्पन्न भएपछि जनपक्षीय काम गर्ने र प्रतिवद्धतामा कुनै शंका नराख्न मतदातालाई आश्वस्त पार्नुभयो।
घरदैलो तिलोत्तमा वडा नम्बर १ का बुद्धटोल, नयाँ चपरहट्टी टोल, शिवचोक, प्यारामाउण्ट टोल, मिलनटोल, प्रगतिटोल, सरस्वती टोलमा गरिएको थियो। वडा नम्बर ५ को नयाँमिल, डाईभरटोल र वडा नम्बर ४ को शिवपुर लगायतका क्षेत्रमा पनि घरदैलो गरिएको निर्वाचन समितिका संयोजक नारायण जी.सी. ‘निर्मल’ले जानकारी दिनुभयो।
उहाँका अनुसार मतदातालाई आफ्नो अमूल्य मतले पाँच वर्षको लागि भाग्य र भविष्य निर्धारण गर्ने भएकाले संयम र विवेकका साथ मतदान गर्न आग्रह गरिएको थियो।
