बुटवल :- नेपाली कांग्रेस गुल्मी क्षेत्र नम्बर–१ र २ का उम्मेदवारहरूले आगामी प्रधानमन्त्री गगनकुमार थापा हुने दाबी गर्दै कांग्रेसलाई विजयी गराउन मतदातासँग आग्रह गरेका छन्।
नेपाली कांग्रेस गुल्मी–रुपन्देही सम्पर्क समितिले तिलोत्तमामा आयोजना गरेको उम्मेदवार भेटघाट तथा अन्तरक्रिया कार्यक्रममा बोल्दै गुल्मीका दुवै क्षेत्रका कांग्रेस उम्मेदवारहरूले पार्टी रूपान्तरण भइसकेको र अब समग्र मुलुक परिवर्तन गर्ने क्षमता कांग्रेससँग रहेको बताएका हुन्।
नेपाली कांग्रेसका नेता तथा गुल्मी क्षेत्र नम्बर–१ का उम्मेदवार डा. चन्द्र भण्डारीले सिंगो कांग्रेस एकजुट भएको र देशभर चुनावी उत्साहको वातावरण सिर्जना भएको बताउनुभयो। उहाँले यस निर्वाचनमा कांग्रेसका ११० जना उम्मेदवार नयाँ अनुहार रहेको उल्लेख गर्दै पार्टी परिवर्तन भएकै कारण जनस्तरमा आशा र विश्वास बढेको दाबी गर्नुभयो।
प्रतिनिधिसभा निर्वाचनपछि संविधान संशोधन आवश्यक रहेको धारणा राख्दै भण्डारीले वर्तमान राजनीतिक आवश्यकताले पनि यही माग गरिरहेको बताउनुभयो। आफूले संसदमा रोपेको परिवर्तनको बीउबाट गगन थापाजस्ता नयाँ नेतृत्व जन्मिएको उल्लेख गर्दै उहाँले रूख चिन्हमा मतदान गरे कांग्रेसको सरकार बन्ने र सुशासनसहित देश मजबुत हुने विश्वास व्यक्त गर्नुभयो।
त्यस्तै, नेपाली कांग्रेस गुल्मी क्षेत्र नम्बर–२ का उम्मेदवार भुवनप्रसाद श्रेष्ठले विशेष महाधिवेशनपछि कांग्रेस बदलिएर नयाँ उत्साहका साथ चुनावी मैदानमा उत्रिएको बताउनुभयो। अबको प्रधानमन्त्री गगनकुमार थापा हुने विश्वास व्यक्त गर्दै उहाँले रूख चिन्हमा मतदान गरेर देश परिवर्तन गर्न आग्रह गर्नुभयो।
रुपन्देही क्षेत्र नम्बर–२ बाट प्रतिनिधिसभा सदस्यका उम्मेदवार चुन्नप्रसाद पौडेलले सबैको सहयोग, एकता र ऊर्जाले बुटवलमा कांग्रेसको विरासत पुनः स्थापित हुने बताउनुभयो। यसपटक कांग्रेस नयाँ अनुहारसहित चुनावी प्रतिस्पर्धामा उत्रिएको उल्लेख गर्दै उहाँले काम गर्ने अवसर दिन मतदातासँग आग्रह गर्नुभयो।
कांग्रेस गुल्मीका सभापति खिलध्वज पन्थीले कांग्रेसकै नेतृत्वमा देश परिवर्तनको दिशामा अघि बढिरहेको दाबी गर्दै गुल्मीका दुवै निर्वाचन क्षेत्रमा कांग्रेसको जित सुनिश्चित रहेको बताउनुभयो। उहाँले कार्यकर्ताहरूलाई उच्च मनोबलका साथ चुनावी अभियानमा जुट्न निर्देशन दिनुभयो।
कार्यक्रम गुल्मी–रुपन्देही सम्पर्क समितिका अध्यक्ष गोपाल ज्ञवालीको अध्यक्षतामा सम्पन्न भएको थियो।
