झापा:- सेयर बजार अभियान्ता सुवासचन्द्र भट्टराईले झापा निर्वाचन क्षेत्र नम्बर–५ लाई परिवर्तन र पाहुनाको सम्मान गर्ने क्षेत्रको रूपमा व्याख्या गर्दै काठमाडौं महानगरपालिकाका मेयर बालेन्द्र शाह (बालेन) लाई खुलेर स्वागत गरेका छन्।
भट्टराईले सामाजिक तथा सार्वजनिक अभिव्यक्तिमार्फत भनेका छन्,
“झापा–५ मा स्वागत छ बालेन। तपाईं बसेको घर, केपी बा को घर र मेरो घर एकै वडा भित्र पर्छ। यो पाहुनालाई स्वागत गर्ने क्षेत्र हो — झापा–५।”
उनले झापा–५ ले विगतदेखि नै बाहिरबाट आएका नेताहरूलाई पनि स्वीकार र समर्थन गर्दै आएको दाबी गरे। भट्टराईका अनुसार,
“पाहुनालाई अहिलेसम्म झापा–५ मा हामीले हराएका छैनौँ।”
इतिहास स्मरण गर्दै उनले २०४८ सालमा पृथ्वीनगरबाट आएर निर्वाचित भएका खड्गप्रसाद ओली (केपी शर्मा ओली) को उदाहरण प्रस्तुत गरे। त्यसैगरी, माओवादी पृष्ठभूमिका विश्वदीप लिङ्देनलाई पनि झापा–५ ले जिताएको उल्लेख गर्दै भट्टराईले यो क्षेत्र परिवर्तन र विकल्पको पक्षमा उभिने परम्परा बोकेको बताए।
उनले वर्तमान राजनीतिक परिवेशतर्फ संकेत गर्दै थपे,
“अब परिवर्तन चाहन्छौँ। तपाईंलाई जिताउनेछौँ।”
भट्टराईको यो अभिव्यक्तिसँगै झापा–५ को राजनीतिक बहस थप चर्किएको छ। बालेन शाहको सम्भावित उम्मेदवारीलाई लिएर समर्थक र आलोचकबीच चर्चा बढ्दै जाँदा, झापा–५ आगामी निर्वाचनमा प्रतिष्ठाको क्षेत्र बन्दै जाने संकेत देखिएको छ।
