गुल्मी:- धुर्कोट गाउँपालिका–बर्बोट, गुल्मीको आयोजनामा सम्पन्न राष्ट्रपति रनिङ शिल्ड प्रतियोगिता–२०८२ मा इन्दिरा माध्यमिक विद्यालय, धुर्कोट गाउँपालिका उत्कृष्ट प्रदर्शन गर्दै समग्र विजेता बन्न सफल भएको छ।
प्रतियोगितामा इन्दिरा माविले ७ स्वर्ण, २ रजत र ५ कास्य गरी जम्मा १४ पदक जित्दै प्रथम स्थान हासिल गरेको हो। गत वर्ष ५ स्वर्ण पदकसहित तृतीय स्थानमा सीमित भएको विद्यालयले यस वर्ष उल्लेखनीय सुधार गर्दै उपाधि जित्न सफल भएको विद्यालय प्रशासनले जनाएको छ।
धुर्कोट गाउँपालिकाका ७ वडा अन्तर्गतका १२ वटा सञ्चालित विद्यालयहरू तथा समग्र ११ वटा माध्यमिक विद्यालयबीच भएको कडा प्रतिस्पर्धामा इन्दिरा माविले आफूलाई अब्बल सावित गर्नु सामान्य उपलब्धि नभएको विद्यालयको भनाइ छ।
यस ऐतिहासिक सफलतामा योगदान पुर्याउने खेलाडी भाइबहिनीहरूको अथक मेहनत, लगनशीलता र अनुशासनको विद्यालयले उच्च प्रशंसा गरेको छ। साथै खेलाडीहरूलाई निरन्तर मार्गदर्शन गर्दै सफलतासम्म पुर्याउन महत्वपूर्ण भूमिका निर्वाह गर्नुहुने सहायक प्रधानाध्यापक राम बहादुर जिसी, खेल संयोजक शोभाखर घिमिरे तथा खेल समितिका सदस्यहरू, साथै सम्पूर्ण शिक्षक–कर्मचारीहरूप्रति विद्यालयले हार्दिक आभार व्यक्त गरेको छ।
त्यसैगरी विद्यालय व्यवस्थापन समितिका अध्यक्ष लोक बहादुर खत्री तथा सदस्यहरू, शिक्षक अभिभावक संघका अध्यक्ष सूर्यप्रसाद भण्डारी लगायत पदाधिकारीहरू, खेल मैदानमा उपस्थित भई हौसला प्रदान गर्ने पूर्व विद्यार्थी, अभिभावक तथा वर्तमान विद्यार्थीहरूप्रति पनि विद्यालयले विशेष कृतज्ञता व्यक्त गरेको छ।
विद्यालयले धुर्कोट गाउँपालिकाका अध्यक्ष भुपाल पोखरेल, उपाध्यक्ष सीता गिरी, प्रमुख प्रशासकीय अधिकृत रुद्र पछाईलगायत सम्पूर्ण जनप्रतिनिधि तथा कर्मचारीहरूको निरन्तर सहयोग, सद्भाव र मार्गदर्शनप्रति पनि आभार प्रकट गरेको छ।
विद्यालय प्रशासनले आगामी दिनमा खेलकुद, शैक्षिक तथा सह–पाठ्यक्रम गतिविधिका सबै क्षेत्रमा अझ उत्कृष्ट बन्न निरन्तर प्रयासरत रहने र त्यसका लागि सबै पक्षको रचनात्मक सहयोगको अपेक्षा गरिएको जनाएको छ।
